پنجاب یونیورسٹی کےفلم اینڈ براڈکاسٹنگ ڈیپارٹمنٹ کو فلٹریشن پلانٹ کا عطیہ

لاہور:پنجاب یونیورسٹی کےشعبہ فلم اور براڈکاسٹنگ کی چیئرپرسن ڈاکٹر لبنیٰ ظہیر نے اسکول آف کمیونیکیشن اسٹڈیز میں جدید واٹر فلٹریشن پلانٹ عطیہ کرنے پر سرور فاؤنڈیشن کا تہہ دل سے شکریہ ادا کیا،یہ عطیہ ڈاکٹر لبنیٰ ظہیر کی درخواست پر دیا گیا۔
 افتتاحی تقریب سابق گورنر پنجاب چوہدری محمد سرور اور پنجاب یونیورسٹی کے وائس چانسلر پروفیسر ڈاکٹر محمد علی کی موجودگی میں منعقد ہوئی۔
تقریب سے خطاب کرتے ہوئے وائس چانسلر ڈاکٹر محمد علی نے طلبہ اور عملے کے لیے صاف پانی تک رسائی کی اہمیت پر زور دیا، انہوں نے چوہدری سرور اور سرور فاؤنڈیشن کو عوامی فلاح و بہبود کے لیے ان کی خدمات پر سراہا اور یونیورسٹی کی مدد کرنے پر ان کا شکریہ ادا کیا۔

ڈاکٹر لبنیٰ ظہیر نے امید ظاہر کی کہ سرور فاؤنڈیشن کے ساتھ یہ اشتراک مستقبل میں مزید فلاحی منصوبوں کا باعث بنے گا۔
 فلٹریشن پلانٹ فی گھنٹہ 2000 لیٹر پانی صاف کرنے کی صلاحیت رکھتا ہے اور یونیورسٹی کے ہزاروں طلبہ، اساتذہ اور رہائشیوں کو فائدہ پہنچائے گا،انہوں نے اس منصوبے کی کامیاب تکمیل میں معاونت پر حمزہ ڈوگر کا بھی شکریہ ادا کیا۔