غزہ: حماس 5 سالہ جنگ بندی کے بدلے اسرائیلی قیدیوں کی رہائی پر تیار

غزہ:فلسطینی مزاحمتی تحریک حماس اسرائیل کے ساتھ 5 سالہ مشروط جنگ بندی کے لیے راضی ہو گئی۔
غیر ملکی میڈیا رپورٹس کے مطابق حماس کا کہنا ہے کہ اگر غزہ میں 5 سال کے لیے وحشیانہ کارروائیاں روک دی جاتی ہیں تو اسرائیل کے تمام قیدیوں کو رہا کر دیا جائے گا۔

 رپورٹس میں مزید بتایا گیا کہ حماس کے ایک اعلیٰ عہدیدار نے شناخت ظاہر نہ کرنے کی شرط پر بتایا کہ حماس ایک ہی دفعہ قیدیوں کے تبادلے اور 5 سال کی جنگ بندی کے لیے تیار ہے۔
خیال رہے کہ اس سے قبل فلسطینی تنظیم نے 17 اکتوبر کو جزوی جنگ بندی کی تجویز کی مخالفت کی تھی اور اسرائیل کی جانب سے 10 قیدیوں کے بدلے 45 روز کے لیے جنگ بندی کی تجویز کو مسترد کر دیا تھا۔
واضح رہے کہ 7 اکتوبر 2023 کو شروع ہونے والی جنگ سے قبل حماس نے 251 اسرائیلیوں کو حراست میں لیا تھا جن میں سے درجنوں کو معاہدوں کے تحت رہا کیا گیا اور متعدد اسرائیلی حملوں میں مارے گئے تاہم اس وقت حماس کی قید میں 58 اسرائیلی موجود ہیں۔
جبکہ غزہ کی وزارت صحت کے مطابق اسرائیلی بربریت اور وحشیانہ کارروائیوں کے نتیجے میں 60 ہزار سے زائد فلسطینی شہید جبکہ دو لاکھ کے قریب افراد زخمی ہو چکے ہیں ، اس کے علاوہ غزہ کے لاکھوں شہری اپنے گھر اور کاروبار سے محروم ہو چکے ہیں۔