پاکستانی مندوب کی یو این سیکرٹری جنرل سے ملاقات، خطے میں کشیدگی کم کرنے پر گفتگو

اقوام متحدہ میں پاکستان کے مستقل مندوب سفیر عاصم افتخار نے اقوام متحدہ کے سیکرٹری جنرل انتونیو گوتریس سے ملاقات کی ہے۔

دونوں رہنماؤں کے درمیان ہونے والی ملاقات میں جنوبی ایشیا کی تازہ ترین صورتحال پر بات کی گئی، اس دوران خطے میں کشیدگی کم کرنے سے متعلق امور پر بھی گفتگو کی۔

پاکستان کے مستقل مندوب عاصم افتخار نے خطے میں امن اور استحکام کیلئے پاکستان کا عزم دہرایا۔

دوسری جانب اقوام متحدہ میں پاکستان کے مستقل مندوب عاصم افتخار آج نیویارک میں اہم پریس کانفرنس کریں گے، یہ پریس کانفرنس پاکستانی وقت کے مطابق رات 8 بجے ہوگی۔

اس سے قبل پاکستانی مندوب عاصم افتخار نے او آئی سی گروپ کے سفیروں کو جنوبی ایشیا کی تازہ ترین صورتحال سے آگاہ کرتے ہوئے کہا تھا کہ بھارت سیاسی بنیادوں پر اور غیر ذمہ دارانہ انداز سے انتہائی اشتعال انگیزی پر اترا ہوا ہے جو کہ علاقائی امن اور استحکام کیلئے سنگین خطرہ ہے۔

دوسری جانب امریکا میں پاکستان کے سفیر رضوان سعید شیخ کا کہنا ہے کہ امریکا میں یہ توقع کی جا رہی ہے کہ پہلگام واقعے کے بعد ذمہ دارانہ رویے کا مظاہرہ کیا جائے گا اور اعلیٰ ترین سطح پر امریکی وزیرخارجہ کی طرف سے اس کا اظہار بھی کیا گیا ہے۔

انہوں نے کہا کہ امریکا میں اسی بات پر زور دیا جا رہا ہے کہ پاکستان اور بھارت ذمہ داری کا مظاہرہ کریں اور کشیدگی کو مزید بڑھنے سے روکاجائے۔