وزیراعظم نے نیشنل انٹیلی جنس فیوژن اینڈ تھریٹ اسیسمنٹ سینٹر کا افتتاح کر دیا

اسلام آباد: وزیراعظم شہباز شریف نے نیشنل انٹیلی جنس فیوژن اینڈ تھریٹ اسیسمنٹ سینٹر کا افتتاح کر دیا۔
وزیر اعظم شہباز شریف نے نیشنل انٹیلی جنس فیوژن اور تھریٹ اسیسمنٹ کا دورہ کیا، وزیر اعظم کے ہمراہ سروسز چیف، نائب وزیر اعظم، وزیر دفاع بھی موجود تھے، شہباز شریف کو ادارے کے کام کے حوالہ سے بریفنگ دی گئی۔
شہباز شریف نے کہا کہ نیفٹیک وفاقی ادارہ ہوگا، 50 وفاقی و صوبائی محکمے اور ایجنسیاں ادارے سے مل کر کام کریں گے، ادارہ خطرات سے نمٹنے کے لیے ایک قومی پلیٹ فارم کے طور پر کام کرے گا۔
وزیراعظم آفس کے مطابق صوبائی سطح پر نیفٹیک کے چھ مراکز قائم کیے جائیں گے، اعلامیہ کے مطابق آذاد جموں و کشمیر اور گلگت بلتستان میں بھی نیفٹیک کے مراکز قائم کئے جائیں گے۔
علاوہ ازاںوزیر اعظم نے جدید ترین این آئی ایف ٹی اے سی ہیڈ کوارٹر کا باضابطہ افتتاح بھی کیا، جو پاکستان کی انسداد دہشت گردی کی قومی حکمت عملی کو مربوط بنانے کے لیے محور کا کردار ادا کرے گا۔
اس موقع پر، شہباز شریف نے اس اہم صلاحیت کو عملی جامہ پہنانے میں شامل تمام اسٹیک ہولڈرز کی کوششوں کو سراہا۔
وزیراعظم نے کہا کہ دہشت گردی، غیرقانونی نیٹ ورکس اور بیرونی معاونت کے گٹھ جوڑ کو توڑنے کے لیے مؤثر اور مربوط ادارہ جاتی نظام ناگزیر ہے، نیفٹیک اس مقصد کے حصول میں مرکزی کردار ادا کرے گا۔