سندھ طاس معاہدے کی خلاف ورزی جنگی اقدام تصور ہو گا : اسحاق ڈار

نائب وزیراعظم اور وزیرخارجہ اسحاق ڈار نے امریکی میڈیا سے بات کرتے ہوئے کہا ہے کہ سندھ طاس معاہدے سےچھیڑ چھاڑ کی گئی تو اس کو جنگی اقدام تصور کریں گے۔

وزیر خارجہ اسحاق ڈار نے کہا کہ کشیدگی بڑھنے اور ہمارےدفاعی ردعمل پرکچھ ممالک خاص طور پرامریکا کو کو احساس ہوا کہ اگلا قدم بہت خطرناک اور تباہ کن ہوسکتا ہے۔

نائب وزیراعظم نے کہا کہ پاکستان واضح کرچکاکہ سندھ طاس معاہدے سےچھیڑ چھاڑکو جنگی اقدام تصور کرینگے،اگر پانی کو موڑا یا بند کیا گیا تو ہم اسے جنگ کا اقدام تصور کریں گے۔

اسحاق ڈار نےکہا کہ بھارتی وزیر خارجہ جےشنکر سے بات کرنے کے بعد سیکرٹری روبیو نےمجھ سےبات کی،یہ ٹیلیفونک رابطہ 10 مئی کو اس وقت ہوا جب ہمارا آپریشن تقریباً مکمل ہوچکا تھا، سیکرٹری روبیو نے کہا کہ بھارت اب رکنےکے لیے تیار ہے،اس پرروبیوکوکہا یقین دہانی کراتےہیں بھارت دوبارہ کارروائی نہیں کرتا تو ہم بھی نہیں کرینگے،امریکی وزیر خارجہ نے یقین دہانی کرائی کہ اگر ہم جنگ روکنےپررضامند ہوتے تو وہ بھارت بھی ایسا ہی کرے گا اور ایسا ہی ہوا۔ 

اسحاق ڈار نے مزید کہا کہ اس خطےمیں عدم استحکام اورخطرات کی اصل وجہ مسئلہ کشمیر ہے، یہ صرف ہمارا مؤقف نہیں بلکہ بین الاقوامی سطح پر تسلیم شدہ تنازع ہےاوراس معاملےمیں ٹرمپ کا یہ کہنا ہے کہ وہ کردار ادا کرنے کے لیے تیار ہیں یہ بہت اہم ہے۔

ان کا کہنا تھاکہ ہم توبھارت سے جامع مذاکرات کے لیے ہمیشہ سے دستیاب ہیں، یہ دوطرفہ معاملہ ہے، ایک ہاتھ سےتالیاں نہیں بج سکتیں،ہم اکیلے  یہ حل نہیں کرسکتے، یہ سب کے مفاد میں ہے کہ ایسے مسائل کو زیادہ تاخیر سے بچایا جائے۔

نائب وزیراعظم کا کہنا تھا کہ بھارتی فضائیہ کے ساتھ جو کچھ پیش آیا وہ سب نےدیکھ لیا تھا، جب ہم نے 3 دن بعد ڈرون اور میزائل فائر کرکےردعمل دیا تو انہیں بخوبی اندازہ ہوگیا کہ ان کی طرف کتنا نقصان ہو چکا ہے،انہیں اندازہ ہو گیا کہ انہوں نے مس کیلکولیشن کی ہے۔