پی آئی اے نے لاہور سے پیرس کے لیے براہ راست پروازوں کا آغاز کر دیا

لاہور: پاکستان انٹرنیشنل ایئر لائن (پی آئی اے) نے لاہور سے پیرس تک براہ راست فلائٹ آپریشن کا اعلان کر دیا ہے،پروازوں کا  آغاز اگلے ماہ سے ہوگا۔
تفصیلات کے مطابق پی آئی اےنے لاہور سے پیرس تک براہ راست فلائٹ آپریشن کا اعلان کر دیا ہے پہلی پرواز اگلے ماہ 18 جون کو لاہور سے پیرس کے لیے اڑان بھرے گی۔
پی آئی اے انتظامیہ کے مطابق لاہور سے پیرس کے لیے ہفتہ وار پرواز چلائی جائے گی، اس سے مسافروں کو سفری سہولت کے ساتھ زرمبادلہ میں بھی اضافہ ہوگا۔
انتظامیہ کا کہنا ہے کہ پی آئی اے اسلام آباد سے ہفتہ وار دو پروازیں پہلے ہی آپریٹ کر رہی ہے۔
پاکستان میں متعین فرانسیسی سفیر نے پاکستان انٹرنیشنل ایئرلائن کی پیرس کے لیے پروازوں کی بحالی کو خوش آئند قرار دیا تھا اور فرانسیسی سفارتکاروں نے وطن واپسی کیلیے پی آئی اے کی براہ راست پرواز کا انتخاب کیا تھا۔
خیال رہے کہ اس سے قبل پی آئی اے نے گزشتہ چند ماہ کے دوران 8 انٹرنیشنل روٹس بحال کیے تھے، جب کہ ساڑھے چار سال بعد رواں برس اسلام آباد ایئرپورٹس سے پیرس کے لیے پروازیں بحال کی گئی تھیں۔