پاکستان کا بنگلہ دیش کے خلاف ٹی20 سیریز کےلیے 16 رکنی سکواڈ کا اعلان

بنگلہ دیش کے خلاف ٹی20 سیریز کے لیے 16رکنی پاکستانی سکواڈ کا اعلان، بابر، رضوان اور شاہین  کو ڈراپ کردیاگیا۔سلمان علی آغا کپتان برقرار، مائیک ہیسن پہلی بار بطور ہیڈ کوچ ذمہ داریاں سنبھالیں گے۔

پاکستان کرکٹ بورڈ کی سلیکشن کمیٹی نے بنگلہ دیش کے خلاف آئندہ 3 میچوں پر مشتمل ٹی20 سیریز کے لیے 16 رکنی قومی اسکواڈ کا اعلان کردیا ہے۔ سلمان علی آغا ٹیم کی قیادت جاری رکھیں گے جب کہ شاداب خان نائب کپتان ہوں گے۔

سیریز کے تمام میچز لاہور کے قذافی اسٹیڈیم میں کھیلے جائیں گے، جب کہ سیریز کا باضابطہ شیڈول جلد جاری کیا جائے گا۔اسکواڈ کا انتخاب ایچ بی ایل پی ایس ایل 10 میں کھلاڑیوں کی کارکردگی کی بنیاد پر کیا گیا ہے، جو 25 مئی کو اختتام پذیر ہو رہی ہے۔ یہ سیریز نئے ہیڈ کوچ مائیک ہیسن کے لیے بطور کوچ پہلا انٹرنیشنل اسائنمنٹ بھی ہوگی۔

16رکنی قومی سکواڈ میں سلمان علی آغا (کپتان)،شاداب خان (نائب کپتان)  ہوں گے،کھلاڑیوں میں ابرار احمد،فہیم اشرف،فخر زمان،حارث رؤف،حسن علی،حسن نواز،حسین طلعت،خوشدل شاہ،محمد حارث  ،محمد وسیم جونیئر،محمد عرفان خان،نسیم شاہ،صاحبزادہ فرحان ،صائم ایوب شامل ہیں۔ یہ اسکواڈ نوجوان اور تجربہ کار کھلاڑیوں کا امتزاج ہے، جس کا مقصد ٹیم کو آئندہ بین الاقوامی چیلنجز کے لیے مضبوط بنانا ہے۔