سپیکر، ڈپٹی سپیکر سمیت 7 وزرا سے اضافی سیکیورٹی واپس لے لی گئی

 ذرائع کے مطابق   کابینہ ڈویژن نے وزیر دفاع پرویز خٹک، وفاقی وزیر فواد چوہدری اور شیریں مزاری سے اضافی سیکیورٹی واپس لے لی ہے، سپیکر اسد قیصر اور ڈپٹی سپیکر سے بھی اسلام آباد پولیس کے اضافی اہلکار واپس لے لیے گئے۔وزیراعظم کی ہدایت پر کابینہ ڈویژن نے وزرا سے اضافی سیکیورٹی واپس لینے کا عمل شروع کر دیا ہے۔

ذرائع کا  کہنا ہے کہ  سپیکر، ڈپٹی سپیکر سمیت 7 وزرا سے اضافی سیکیورٹی واپس لے لی گئی ہے،پرویز خٹک، فواد چوہدری، شیریں مزاری سمیت وزرا کو صرف دو پولیس اہلکار دیے گئے ہیں ۔وزرا کے ساتھ اسلام آباد پولیس کے 2 اہلکار سیکیورٹی پر مامور رہیں گے۔

 ذرائع کے مطابق  شیریں مزاری نے سیکیورٹی واپس لینے پر احتجاج کیا ہے،شیریں مزاری کے پاس 5 اہلکاروں میں سے 3 کو واپس بلا لیا گیا۔شیریں مزاری کا کہنا ہے کہ مجھے سکواڈ کی گاڑی تک نہ دی گئی اس کے باوجود میری سیکیورٹی کیوں کم کی گئی۔وزیر دفاع کو بھی صرف دو اہلکار دیے گئے جبکہ  چیئرمین سینیٹ کو دی گئی نفری برقرار رہے گی۔

چند روز قبل سماجی رابطے کی ویب سائٹ ٹوئٹر پر ایک ٹویٹ میں  وزیراعظم عمران خان نے کہا تھا کہ آئندہ کسی نجی تقریب میں پروٹوکول اور سیکیورٹی کے ساتھ نہیں جاوں گا،ہمارا مقصد ہے کہ عوام کے ٹیکس کا پیسہ بچائیں اور عوام کسی تکلیف میں مبتلا نہ ہو۔

 وزیراعظم کا ٹویٹ میں کہنا تھا کہ  پی ٹی آئی کے وزرائے اعلی، گورنرز اور وزراء کی سیکیورٹی اور پروٹوکول پر بھی نظرثانی کررہا ہوں،اگلے کابینہ اجلاس میں اس حوالے سے جامع پالیسی پر فیصلہ کریں گے،  ہم عوام کو مرعوب کرنے والے نوآبادیاتی کلچر کا خاتمہ کریں گے ۔