ڈی آئی خان: پولیس کی کارروائی میں5 مزدور بازیاب ، دہشت گردوں کے 13 سہولت کار گرفتار

ڈی آئی خان: خیبر پختونخوا کے ضلع ڈیرہ اسماعیل خان میں پولیس نے کلاچی اور درابن کے علاقوں میں نجی کمپنی کے مغوی مزدوروں کی بازیابی کے لیے بڑا آپریشن کیا۔ 
پولیس اور اغواکاروں کے درمیان شدید فائرنگ کا تبادلہ بھی ہوا، جس کے بعد 13 مغوی مزدوروں میں سے 5 کو بحفاظت بازیاب کرالیا گیا

پولیس حکام کے مطابق باقی 8 مغوی مزدوروں کی بازیابی کے لیے آپریشن تاحال جاری ہے اور انشاءاللہ جلد انہیں بھی بحفاظت بازیاب کرالیا جائے گا۔
حکام کا کہنا ہے کہ پولیس نے کارروائی کے دوران دہشت گردوں کے 13 سہولت کاروں کو بھی گرفتار کرلیا، جبکہ دہشتگردوں کے متعدد ٹھکانوں کو بھی نشانہ بنایا گیا۔

پولیس حکام کا کہنا ہے کہ مغویوں کی بازیابی اور دہشتگردوں کے نیٹ ورک کی مکمل بیخ کنی تک آپریشن جاری رہے گا۔

خیال رہے کہ پرائیویٹ کمپنی کے 16 ملازمین 3 گاڑیوں میں اسلام آباد سے کوئٹہ جاررہے تھے کہ نامعلوم اغوا کاروں نے 2 گاڑیوں کو 10 ملازمین سمیت اغوا کرلیا، جن میں سے 6 ملازمین کو پولیس نے تعاقب کرکے بازیاب کرا لیا ہے، تاحال یہ معلوم نہیں ہو سکا کہ اغوا کار ملازمین کو کہاں لے گئے ہیں۔