بھارت کو پاکستان کے حصے کا پانی بند نہیں کرنے دیں گے ، احسن اقبال

وفاقی وزیر پلاننگ اینڈ ڈویلپمنٹ احسن اقبال کا کہنا ہے کہ بھارت کو پاکستان کے حصے کا پانی بند نہیں کرنے دیں گے۔

نارووال میں میڈیا سے گفتگو کرتے ہوئے وفاقی وزیر احسن اقبال کا کہنا تھا کہ عید الاضحیٰ کی پوری قوم کو مبارکباد پیش کرتا ہوں۔

وفاقی وزیر کا کہنا تھا کہ بھارت اگر سمجھتا ہے کہ ہمارے دریاؤں کا پانی روک کر پاکستان کی معشیت کو نقصان پہنچا سکتا ہے تو یہ اس کی بھول ہے، پاکستان کے حصے کا پانی بند نہیں کرنے دیں گے اور نہ پانی سے کھیل کھیلنے دیں گے۔

احسن اقبال کا کہنا تھا کہ آپریشن سندور کا منطقی انجام اب بھارت کے وزیراعظم نریندر مودی کی شکست سے ہوگا، وہ صرف اپنی شکست چھپانے کے لئے نت نئی تاویلیں بیان کر رہے ہیں۔

انہوں نے کہا کہ جو نفرت کی سیاست ملک اور خطے میں شروع کی تھی اب منطقی انجام کی طرف بڑھ رہی ہے۔

ان کا کہنا تھا کہ چند دنوں میں نیا بجٹ پیش کیا جائے گا، حکومت کی کوشش ہو گی مالیت ڈسپلن کو برقرار رکھا جائے، یکم اپریل 2022 کو پچھلی حکومت ملک کی معشیت کو دیوالیہ کرکے گئی تھی، بینکوں کا پالیسی ریٹ 23 فیصد سے 11 فیصد پر آچکا ہے، مزید کمی کا امکان ہے، پاکستان میں سرمایہ کاری کا رجحان بڑھ رہا ہے، ضرورت یہ ہے ہم استحکام کو برقرار رکھتے ہوئے پاکستان کی معشیت کو پائیدار راستے کی ترقی پر ڈالیں۔