احمد آباد میں میں پیش آنے والا سانحہ ہمیں ہلا کر رکھ گیا ہے،یہ دکھ الفاظ سے باہر ہے،مودی

نئی دہلی: بھارت ریاست گجرات کے شہر احمد آباد میں طیارے حادثے کا افسوسنا ک واقعہ پیش آیا ہے،جہاں  ایئر انڈیا کی پرواز AI-171 جمعرات کو احمد آباد سے لندن کے لیے روانہ ہوئی تھی لیکن ٹیک آف کے چند ہی لمحوں بعد گر کر تباہ ہوگئی، جس میں 242 افراد سوار تھے۔
 ایئر انڈیا کے افسوسناک فضائی حادثے پر بھارتی وزیراعظم نریندر مودی اور برطانوی وزیراعظم کیئر اسٹارمر نے گہرے دکھ اور افسوس کا اظہار کیا ہے۔
بھارتی وزیر اعظم نریندرمودی نے سوشل میڈیا پلیٹ فارم ایکس (X) پر جاری بیان میں کہا: "احمد آباد میں پیش آنے والا سانحہ ہمیں ہلا کر رکھ گیا ہے۔ یہ دکھ الفاظ سے باہر ہے۔
اپنے بیان میں انہوں نے مزید کہا کہ مشکل کی اس گھڑی میں میری دعائیں اور ہمدردیاں متاثرہ افراد اور ان کے خاندانوں کے ساتھ ہیں۔ وزراء اور متعلقہ ادارے فوری امدادی کارروائیوں میں مصروف ہیں۔"

دوسری جانب، برطانیہ کے وزیراعظم کیئر اسٹارمر نے بھی اس واقعے کو دل دہلا دینے والا قرار دیا۔ انہوں نے کہا: "احمد آباد میں لندن جانے والے طیارے کا حادثہ تباہ کن مناظر پیش کر رہا ہے، جس میں کئی برطانوی شہری بھی سوار تھے۔
برطانوی وزیر اعظم نے مزید کہا کہ  میں مسلسل صورت حال پر نظر رکھے ہوئے ہوں اور میری دعائیں مسافروں اور ان کے خاندانوں کے ساتھ ہیں۔"
خیال رہے کہ اب تک کی ابتدائی اطلاعات کے مطابق طیارہ حادثے میں جاں بحق ہونے والے مسافرو ں کی تعداد 30 سے زائد ہو گئی ہے۔