تاریخ میں پہلی بارملکی معیشت کا حجم 400 ارب ڈالر کی حد کراس کرگیا، وزیر خزانہ

اسلام آباد: وفاقی وزیر خزانہ محمد اورنگزیب نے کہا ہے کہ ملکی تاریخ میں پہلی بار معیشت کا حجم 400 ارب ڈالر کی حد کراس کر گیا۔

تفصیلات کے مطابق وزیر خزانہ محمد اورنگزیب نے قومی اسمبلی کی قائمہ کمیٹی برائے خزانہ کو بریفنگ میں کہا کہ حکومت نے پچھلے سال افراط زر کو 23.4 فیصد سے 4.6 فیصد تک کم کیا اور شرح سود 22 فیصد کی ریکارڈ بلند سطح سے 11 فیصد پر آ گئی۔

انہوں نے کہا کہ پچھلے سال کی نسبت جی ڈی میں 10.5 فیصد اضافہ ہوا۔ اور ایف بی آر کے محصولات میں 26 فیصد اضافہ ہوا،جبکہ ملکی معیشت کا حجم تاریخ میں پہلی دفعہ 400 ارب ڈالر کی حد عبور کر گیا۔

 انہوں نے مزید کہا کہ معیشت کے اعتبار سے ملکی قرضوں میں کمی ہوئی اور قرض مدت سے قبل ادا کیا۔ ترسیلات زر اس سال 38 ارب ڈالر تک ہوں گی۔ جبکہ پچھلے 2 سال میں ترسیلات زر میں 10 ارب ڈالر کا ریکارڈ اضافہ ہوا۔

بریفنگ میں انہوں نے مزید بتایا کہ پرائمری سرپلس معیشت کے 3 فیصد کر برابر ہو گیا جو پچھلے 20 سالوں کی بلند ترین سطح ہے۔ پچھلے سال کے 1.3 ارب ڈالر کرنٹ اکاؤنٹ خسارہ کی نسبت اس سال کرنٹ اکاؤنٹ 1.9 ارب ڈالر سرپلس ہے۔ ملکی برآمدات میں تقریباً 7 فیصد اور بالخصوص آئی ٹی برآمدات میں 21 فیصد کا ریکارڈ اضافہ ہوا ہے۔

انہوں نے کہا کہ ملکی برآمدات میں تقریباً 7 فیصد اور آئی ٹی برآمدات میں 21 فیصد اضافہ ہوا۔ معاشی کامیابیوں اور حاصل اہداف کو عالمی مالیاتی اداروں نے تسلیم کیا۔ جبکہ فچ اور دیگر ریٹنگ ایجنسیوں نے پاکستان کی ریٹنگ کو اپ گریڈ کیا۔ محض معیشت میں بہتری منزل نہیں بلکہ یہ بڑی منزل کے حصول کا راستہ ہے۔

محمد اورنگزیب نے کہا کہ زراعت پر کوئی نیا ٹیکس نہیں لگایا۔ اور چھوٹے کاروباروں کو فناسنگ سپورٹ دی۔ بینظیر انکم سپورٹ پروگرام (بی آئی ایس پی) میں 700 ارب سے زائد اضافہ کیا۔ اور بی آئی ایس پی سے ایک کروڑ سے زائد گھرانے مستفید ہوں گے۔

انہوں نے کہا کہ ٹیرف اور خام مال کی ڈیوٹیوں میں کمی کے ذریعے ایکسپورٹرز کو فائدہ پہنچا کر برآمدات بڑھائی جائیں گی۔