پوری مسلم امہ ایران کی سپورٹ کے لیے کھڑی ہے،سعودی ولی عہد

ریاض : ایرانی سر زمین پر اسرائیلی حملوں کے خلاف شدید ردعمل دیتے ہوئے سعودی ولی عہد محمد بن سلمان نے کہا ہے کہ پوری مسلم امہ اسرائیلی جارحیت کے خلاف ایران کے ساتھ کھڑی ہے۔

تفصیلات کے مطابق سعودی ولی عہد شہزادہ محمد بن سلمان نے ایرانی صدر مسعود پزشکیان سے رابطہ کیا اور اس مشکل گھڑی میں یکجہتی کا اظہار کرتے ہوئے کہا کہ ہم ایران میں اپنے بھائیوں کے ساتھ کھڑے ہیں۔

ایرانی صدر کے ساتھ گفتگو کرتے ہوئے انہوں نے مزید کہا کہ ایرانی بھائیوں کی سپورٹ کے لئے ہر ممکن کاوشیں جاری رکھیں گے،ہمیں اعتماد ہے ایران دانش مندانہ اقدام کرے گا۔

دوسری جانب ٹیلی فونک رابطے میں ایرانی صدر نے کہ کہا صدارت سنبھالتے ہی امن اور خطے کے استحکام کی کوشش کی، لیکن ان کی ہر کوشش کو صہیونیوں نے ناکام بنانے کی کوشش کی۔

اس کے علاوہ سعودی ولی عہد اور ترکیہ کے صدر کے درمیان بھی رابطہ ہوا، جس میں خطے کی مجموعی صورتحال اور کشیدگی کم کرنے کے ممکنہ اقدامات پر تبادلہ خیال کیا گیا۔

دونوں رہنماؤں نے ایران اسرائیل کشیدگی کے بعد خطے کی صورتحال اور پیش رفت کا جائزہ لیا اور کشیدگی کو کم کرنے کے لیے تحمل مزاجی سے کام لینے کی ضرورت پر زور دیا،دونوں رہنماؤں نے کہا کہ ایران اور اسرائیل مذاکرات کے ذریعے معاملات کو حل کریں۔