اسرائیل جیسے باغی ریاست کی حمایت کے خطرناک نتائج برآمد ہو سکتے ہیں، خواجہ آصف

وزیر دفاع خواجہ آصف نے اسرائیل کی مسلسل جارحیت اور مغربی ممالک کی جانب سے اس کی حمایت پر شدید ردعمل دیتے ہوئے کہا کہ دنیا کو اسرائیل کی جوہری صلاحیت پر خوفزدہ ہونا چاہئے۔

سوشل میڈیا پلیٹ فارم ایکس پر اپنے ٹویٹ میں خواجہ آصف نے کہا کہ دنیا کو اسرائیل کی ایٹمی طاقت پر سنجیدہ تشویش ہونی چاہیے کیونکہ یہ ایک ایسا ملک ہے جو کسی بھی بین الاقوامی ایٹمی ضابطے کا پابند نہیں اور نہ ہی ایٹمی عدم پھیلاؤ کے معاہدے (NPT) یا کسی دوسرے موثر معاہدے کا رکن ہے۔

World should be wary and apprehensive about Israel’s nuclear prowess, a country not bound by any international nuclear discipline not signatory to NPT or any other binding arrangement. Pakistan is signatory to all international nuclear disciplines, our nuclear capability is for…

— Khawaja M. Asif (@KhawajaMAsif) June 15, 2025

انہوں نے مزید کہا کہ اس کے برعکس پاکستان تمام بین الاقوامی ایٹمی اصولوں اور ضوابط کا پابند ہے۔ ہماری ایٹمی صلاحیت کا مقصد صرف اپنے عوام کی فلاح و بہبود اور دشمنوں کے جارحانہ عزائم کے خلاف ملکی دفاع ہے۔ ہم اپنے ہمسایہ ممالک کے خلاف کسی قسم کی بالادستی کی پالیسی نہیں رکھتے، جیسا کہ اسرائیل کے حالیہ اقدامات سے اس کی جارحانہ سوچ واضح ہو رہی ہے۔

وزیر وفاع نے کہا کہ مغربی دنیا کو اسرائیل کی طرف سے پیدا کیے جانے والے تنازعات پر سنجیدگی سے غور کرنا چاہیے، کیونکہ یہ تنازعات نہ صرف خطے بلکہ پوری دنیا کو اپنی لپیٹ میں لے سکتے ہیں۔

خواجہ آصف نے خبردار کرتے ہوئے کہا کہ اسرائیل جیسے باغی ریاست کی حمایت کے خطرناک نتائج برآمد ہو سکتے ہیں، جن سے عالمی امن کو شدید خطرات لاحق ہوں گے۔