کراچی ایئرپورٹ پرخودکش حملےکا حتمی چالان عدالت میں پیش

کراچی:  کاؤنٹر ٹیررازم ڈیپارٹمنٹ( سی ٹی ڈی)نے کراچی ایئرپورٹ پر ہونے والے خودکش حملے کے کیس کا حتمی چالان انسداد دہشت گردی عدالت (اے ٹی سی ) میں جمع کرا دیا ہے۔

چالان میں حملے کے ماسٹر مائنڈ کمانڈر بشیر بلوچ عرف بشیر زیب اور عبدالرحمان عرف رحمان گل کو مفرور قرار دیا گیا ہے۔

 عدالت نے دونوں دہشتگردوں کو اشتہاری قرار دینے کی کارروائی شروع کرنے کا حکم بھی جاری کر دیا ہے،جبکہ عدالت نے تفتیشی افسر کو مفرور ملزمان کے خلاف زیر دفعہ 87، 88 کی کارروائی شروع کرنے کا حکم دیا۔

علاوہ ازاں اے ٹی سی عدالت نے مفرور ملزمان کی جائیدادوں کی تفصیلات بھی طلب کرلیں۔

 چالان میں کہا گیا ہے کہ خود کش دھماکے میں 2 چینی باشندوں سمیت مقامی شہری کی موت ہوئی،جبکہ  دھماکے میں خاتون سمیت 6 افراد زخمی ہوئے۔ ایئر پورٹ حملہ کیس میں ملزم جاوید اور خاتون گل نساء گرفتار ہیں، شاہ فہد نے خودکش دھماکا کیا۔

خیال رہے کہ اکتوبر 2024 میں کراچی ایئرپورٹ کے قریب چینی باشندوں کے کانوائے پر خودکش حملہ کیا گیا تھا، جس میں 2 چینی باشندوں اورایک مقامی شہری کی موت ہوئی اور خاتون سمیت 6 افراد زخمی ہوئے تھے۔

 پولیس کے مطابق ملزمہ گل نساء اور جاوید کو گرفتار کیا جا چکا ہے۔ دونوں پر خودکش حملے میں سہولت کاری کا الزام ہے۔ جبکہ بشیربلوچ عرف بشیرزیب، عبدالرحمان عرف رحمان مفرور ہیں۔