خوراک کے منتظر فلسطینیوں پر اسرائیلی حملے جاری،مزید 47 افراد شہید

غزہ :غزہ میں اسرائیلی فوج کی بربریت جاری ہے،خوراک کی تلاش میں نکلے فلسطینیوں پر اسرائیلی حملوں سے مزید 47 شہری شہید ہو گئے۔ 

غیر ملکی میڈیا ایجنسی کے مطابق اسرائیلی فوج نے آج پھر غزہ میں خوراک کی تلاش میں نکلے فلسطیوں پر حملے کیے جس کے نتیجے میں مزید 47 فلسطینی شہید ہوگئے۔ 

رپورٹ میں مزید بتایا گیا کہ اسرائیلی فوج نے خان یونس میں شہریوں پر اس وقت حملے کیے جب لوگ غزہ میں اسرائیل اور امریکی انتظامیہ کی زیر نگرانی چلنے والے خوراک تقسیمی مراکز پر جمع تھے۔ 

عرب میڈیا کے مطابق اسرائیل کی جانب سے غزہ میں امداد کی آمد بند کرنے کے بعد خوراک کی شدید قلت ہے اور ایسے میں ہر روز ہزاروں شہری خوراک تقسیمی مراکز کے باہر جمع ہوتے ہیں۔ 

خیال رہے کہ  7 اکتوبر سے لے کر اب تک اسرائیلی جارحیت کے نتیجے میں 60 ہزار سےزائد افراد شہید ہو چکے ہیں جن میں اکثریب بچوں اور خواتین کی ہے،جبکہ دو لاکھ کے قریب افراد زخمی ہیں۔

اسرائیل کی جانب سے جاری ناکہ بندی کی وجہ سے لاکھوں فلسطینی خوراک اور ادویات جیسی بنیادی ضروریات سے محروم ہیں۔