ریکو ڈک کو ریلوے لائن نیٹ ورک سے منسلک کیا جائے ، وزیر اعظم

وزیر اعظم محمد شہباز شریف نے ہدایت کی ہے کہ 2028 تک ریکو ڈک کو ریلوے لائن نیٹ ورک سے منسلک کیا جائے۔

انہوں نے یہ ہدایات آج (منگل) اسلام آباد میں پاکستان ریلوے کی اپ گریڈیشن اور ریکوڈک کو ریلوے نیٹ ورک سے منسلک کرنے کے حوالے سے منعقدہ ایک اعلی سطح کے اجلاس کی صدارت کرتے ہوئے جاری کیں۔

وزیراعظم نے ریلوے کی اپ گریڈیشن اور ترقی کیلئے فنانسنگ کے حوالے سے بین الوزارتی کمیٹی تشکیل دینے کی ہدایت کی۔ یہ کمیٹی پاکستان ریلویز کی ترقی اور اس کی ریکو ڈک تک توسیع کیلئے درکار فنانسنگ کے حوالے سے ٹھوس تجاویز پیش کرے گی۔

وزیراعظم نے کہا کہ پاکستان ریلویز ملکی معیشت اور مواصلات میں ریڑھ کی ہڈی کی حیثیت رکھتا ہے۔

انہوں نے کہا کہ پاکستان ریلویز نقل و حمل کا ایک سستا، تیز اور ماحول دوست ذریعہ ہے۔

شہباز شریف نے کہا کہ ریکو ڈک کو ریلوے نیٹ ورک سے منسلک کرنے سے بلوچستان کے مائنز اینڈ منرلز شعبے کی ترقی ہو گی اور علاقے کے عوام کیلئے روزگار کے نئے مواقع بھی پیدا ہوں گے۔

اجلاس میں مستقبل کی کارگو اور نقل و حمل کی ضروریات کے پیش نظر پاکستان ریلویز کی ترقی بشمول ML-1 اور ML-3 کی اپ گریڈیشن پر بریفنگ دی گئی۔