شندور پولو فیسٹیول ،دنیا کے بلند ترین پولو میدان میں آج سے رنگا رنگ تقریب کا آغاز ہو رہا ہے

دنیا کے بلند ترین پولو میدان میں آج سے شندور میلے کا شاندار آغاز ہو رہا ہے۔ میلے کے لیے تمام تر انتظامات مکمل کر لیے گئے ہیں، جبکہ پولو کھلاڑی اور ہزاروں کی تعداد میں شائقین شندور پہنچ چکے ہیں۔

میلے کے دوران روایتی چترال اور گلگت کی پولو ٹیموں کے درمیان دلچسپ مقابلے ہوں گے، جو میلے کا مرکزی حصہ تصور کیے جاتے ہیں۔ شندور کی فضاؤں میں پیراگلائیڈنگ اور پیراشوٹ کے شاندار مظاہرے بھی شائقین کی توجہ کا مرکز ہوں گے۔

ثقافتی رنگوں سے بھرپور اس میلے میں چترالی، بلتی اور کیلاش رقص پیش کیے جائیں گے جو علاقائی ورثے کی خوبصورت جھلک پیش کریں گے۔ شائقین کی بڑی تعداد ان رقصوں سے خوب محظوظ ہوگی۔

شندور میلہ نہ صرف ایک اسپورٹس ایونٹ ہے بلکہ یہ پاکستان کے شمالی علاقوں کی ثقافت، حسن اور مہمان نوازی کا جشن بھی ہے، جہاں مقامی لوگوں کے ساتھ ساتھ ملکی و غیر ملکی سیاح بھی شریک ہوتے ہیں۔