اسرائیل کو ہتھیار نہ دیے جائیں، ورنہ پورے خطے میں جنگ لگ جائے گی ، امریکی یہودی تنظیم

امریکا میں یہودی بآواز امن نامی امریکی یہودیوں کی ایک تنظیم نے امریکی صدر ڈونلڈ ٹرمپ سے مطالبہ کیا ہے کہ اسرائیل کو ہتھیار نہ دیے جائیں، ورنہ پورے خطے میں جنگ لگ جائے گی، امریکہ اسلحہ دینا بند کرے۔

جیوش وائس فار پیس فلسطین کے ساتھ اظہار یکجہتی کرتی ہے اور امریکہ میں عوامی سطح پر آگاہی مہم چلا رہی ہے، اس تنظیم کا بنیادی مؤقف ہے کہ یہودیوں کا نام لے کر اسرائیل کی صہیونی حکومت فلسطین میں مظالم کر رہی ہے۔

 یہودی تنظیم جیوش وائس فار پیس  نے کہا ہے کہ اسرائیل غزہ میں نسل کشی کر رہا ہے، مغرب کی جانب سے اسرائیلی حکومت کے فلسطینیوں کے خلاف جنگی جرائم نظر انداز کرنا اور امریکا کی جانب سے غیر مشروط طور پر ہتھیاروں کی فراہمی کی وجہ سے آج یہ دن آیا ہے کہ مشرق وسطیٰ جھلس رہا ہے۔

امریکا ہر سال اسرائیل کو 3.8 ارب ڈالر کی فوجی امداد دیتا ہے جبکہ غزہ پر بمباری کے بعد اس امداد کو کئی گنا بڑھا دیا گیا۔

یہودی تنظیم نے دو ٹوک کہا کہ اسرائیل غزہ میں نسل کشی کر رہا ہے اور خطے میں جنگ پھیلا رہا ہے، امریکہ اسے مسلح کرنا بند کر دے۔

یہودی تنظیم نے کہا کہ امریکہ کی پشت پناہی اور امداد کی وجہ سے اسرائیل نے ایران سے جنگ چھیڑی اور فلسطین میں بھی لوگوں کو بھوکا مار رہا ہے۔

واضح رہے کہ یہ یہودی تنظیم اسرائیل کی صہیونی حکومت کے خلاف پہلے بھی احتجاج کرتی رہی ہے اور اس کا مطالبہ ہے کہ امریکہ کی حکومت اسرائیل کے مظالم میں ساتھ دینا بند کرے۔