پاکستان اور دنیا بھر میں مقیم کشمیری آج یوم شہدا منارہےہیں

ڈوگرا راج کے خلاف مسلمانوں کے علم بغاوت بلند کرنے کی یاد میں پاکستان سمیت دنیا بھر میں آج یوم شہدائے کشمیر منایا جا رہا ہے۔ اس دن کا مقصد 13جولائی 1931 اورتحریک آزادی کے دیگر تمام شہداء کو خراج عقیدت پیش کرنا ہے۔  مزار شہداء نقشبند صاحب سرینگر کی طرف مارچ  کیا جائے گا جہاں13جولائی 1931کے شہداء دفن ہیں ۔

 یہ دن منانے کی اپیل کل جماعتی حریت کانفرنس اورمیر واعظ عمر فاروق کی سرپرستی میں قائم حریت فورم نے کی ۔ کل جماعتی حریت کانفرنس نے سرینگر سے جاری  بیان میں  لوگوں پر  زوردیا ہے کہ وہ ہڑتال اور مارچ کو کامیاب بناکر دنیا کو یہ واضح پیغام دیں کہ کشمیری عوام اقوام متحدہ کی قراردادوں کے مطابق تنازعہ کشمیر کے پر امن حل پر یقین رکھتے ہیں۔

13 جولائی 1931 کو مہا راجا کشمیر کے سپاہیوں نے ظلم کی وہ داستان رقم کی جس کی تاریخ میں مثال نہیں ملتی، تاہم قربانیوں کا یہ واقعہ تحریک آزادی کی بنیاد بن گیا۔  مسلمانان کشمیر نے ڈوگرہ استبداد کے خلاف علم بغاوت بلند کیا، سری نگر جیل کے باہر اذان کا وقت ہوا تو اذان کی آواز بلند ہوئی۔ مہاراجا کشمیر کے سفاک سپاہیوں نے اذان دینے والے 22 کشمیری مؤذنوں کو شہید کر دیا اور بے شمار مسلمانوں کو گرفتار کرلیا۔

یوں یہ دن کشمیر کی تاریخ میں سنگ میل کی حیثیت اختیار کر گیا۔ 22 مئوذنوں کی شہادت، کشمیریوں میں جذبہ آزادی کو آج بھی زندہ رکھے ہوئے ہے۔ یہی وہ ناقابل فراموش دن ہے جب کشمیریوں نے عہد کیا کہ وہ ہر قیمت پر آزادی حاصل کر کے رہیں گے۔ہر سال 13 جولائی کو کشمیری اس عزم کا اعادہ کرتے ہیں کہ وہ ہندوستانی جبر و استبداد سے آزادی حاصل کر کے رہیں گے۔ 13 جولائی کشمیریوں کے عزم و حوصلے اور جدو جہد کا نشان، ایک لاکھ کشمیری شہداء کا خون تحریک آزادی کشمیر کے زندہ ہونے کی دلیل ہے۔