ایران کے حملے کا بھرپور جواب دیا جائے گا: قطر کی سخت مذمت، میزائل حملہ ناکام بنانے کا دعویٰ

قطر نے ایران کی جانب سے العدید ایئر بیس پر میزائل حملے کی سخت الفاظ میں مذمت کرتے ہوئے کہا ہے کہ ایران کو اس کھلی جارحیت کا بھرپور جواب دیا جائے گا۔ قطری وزارتِ خارجہ کے ترجمان ڈاکٹر ماجد الانصاری نے بیان دیا کہ قطر کو حملے کی نوعیت اور شدت کے مطابق جواب دینے کا پورا حق حاصل ہے، جو بین الاقوامی قوانین کے دائرے میں رہتے ہوئے دیا جائے گا۔

بیان میں ایران کے میزائل حملے کو ریاستِ قطر کی خودمختاری اور فضائی حدود کی سنگین خلاف ورزی قرار دیا گیا، جسے اقوامِ متحدہ کے منشور اور بین الاقوامی ضوابط کی کھلی پامالی کہا گیا۔ وزارتِ خارجہ نے اس بات کی تصدیق کی کہ قطری فضائی دفاعی نظام نے فوری ردعمل دے کر تمام ایرانی میزائل فضا میں ہی تباہ کر دیے، جس سے کوئی جانی یا مالی نقصان نہیں ہوا۔

قطر کا کہنا تھا کہ ایئر بیس کو حفاظتی تدابیر کے تحت پہلے ہی خالی کرا لیا گیا تھا، اور قطری و اتحادی افواج سمیت تمام اہلکار محفوظ رہے۔ وزارتِ دفاع کی جانب سے حملے کی مکمل تفصیلات پر مشتمل ایک علیحدہ رپورٹ جلد جاری کی جائے گی۔

قطری وزارتِ خارجہ نے خبردار کیا کہ اس قسم کی اشتعال انگیز کارروائیاں خطے کے امن و استحکام کو خطرے میں ڈال سکتی ہیں اور ان کے عالمی سطح پر بھی منفی اثرات مرتب ہو سکتے ہیں۔ بیان میں تمام فریقین پر زور دیا گیا کہ وہ فوری طور پر عسکری کارروائیاں بند کریں اور سنجیدہ سفارت کاری کا راستہ اپنائیں۔

ترجمان نے واضح کیا کہ قطر ہمیشہ سے خطے میں بڑھتی ہوئی اسرائیلی جارحیت اور کشیدگی کے خطرات کی نشان دہی کرتا رہا ہے، اور اس کا مؤقف سفارتی ذرائع، پرامن بقائے باہمی اور اشتعال انگیزی سے گریز پر مبنی رہا ہے۔

بیان کے اختتام پر ایک بار پھر زور دیا گیا کہ موجودہ بحرانوں کا واحد پائیدار حل بامعنی مکالمہ اور سفارتی عمل ہے، تاکہ خطے کے عوام کو پائیدار امن فراہم کیا جا سکے۔