قطر میں امریکی اڈے پر حملے کے بعد ایرانی صدر اور امیرِ قطر کے درمیان رابطہ

گزشتہ شب قطر میں امریکی فوجی اڈے پر ایرانی میزائل حملے کے بعد ایرانی صدر مسعود پزشکیان اور امیرِ قطر شیخ تمیم بن حمد آل ثانی کے درمیان ٹیلیفونک رابطہ ہوا۔

ایرانی خبررساں ادارے کے مطابق دونوں رہنماؤں نے مشرق وسطیٰ کی تازہ ترین صورتحال اور خطے میں بڑھتی ہوئی کشیدگی پر تبادلہ خیال کیا۔

ایرانی صدر نے گفتگو کے دوران اس بات پر زور دیا کہ انہوں نے بروقت امیرِ قطر سے رابطہ اس لیے کیا تاکہ وضاحت کر سکیں کہ قطر میں امریکی تنصیب پر حملہ دراصل ایران پر اسرائیلی حملے میں امریکا کی براہ راست شمولیت کا ردِعمل تھا۔

انہوں نے واضح کیا کہ یہ کارروائی قطر کے خلاف کسی بھی قسم کی دشمنی کے تناظر میں نہ لی جائے، اور اسے ایران و قطر کے برادرانہ تعلقات سے علیحدہ سمجھا جائے۔

صدر مسعود پزشکیان نے کہا کہ ایران، قطر کی دوستی، تعاون اور خصوصاً مشکل وقتوں میں حمایت کو نہ صرف تسلیم کرتا ہے بلکہ اس کا تہہ دل سے شکر گزار بھی ہے۔

ایرانی صدر نے ایک بار پھر زور دیا کہ ایرانی میزائل حملے کا مقصد قطر کو نشانہ بنانا ہرگز نہیں تھا، اور نہ ہی ایران کی قطر کے ساتھ کوئی مخاصمت ہے۔