ٹک ٹاکر ثناء یوسف کے قاتل کاکا کا مبینہ اعترافِ جرم، ملاقات سے انکار پر قتل کیا

معروف ٹک ٹاکر ثناء یوسف کے قتل میں گرفتار ملزم عمر حیات عرف "کاکا" نے جوڈیشل مجسٹریٹ کے سامنے مبینہ طور پر جرم کا اعتراف کر لیا ہے۔

ذرائع کے مطابق ملزم نے بیان میں کہا کہ اس نے ثناء یوسف کو ملاقات کے لیے بلایا، لیکن وہ نہیں ملی، جس پر وہ شدید مشتعل ہو گیا۔ ملزم نے دعویٰ کیا کہ وہ ثناء یوسف کی سالگرہ پر تحفہ لے کر آیا تھا، مگر انہوں نے وہ تحفہ لینے سے انکار کر دیا اور اسے واپس جانے کو کہا۔

ملزم عمر حیات نے مزید کہا کہ 2 جون کو ثناء یوسف نے دوبارہ ملاقات کا کہا، لیکن وہ اس دن بھی نہیں ملی، جس پر وہ سخت غصے میں آگیا اور ثناء یوسف کو ان کے گھر جا کر فائرنگ کر کے قتل کر دیا۔

واضح رہے کہ یہ واقعہ 2 جون کو اسلام آباد میں پیش آیا تھا، جب ٹک ٹاکر ثناء یوسف کو ان کے گھر پر گولیاں مار کر قتل کر دیا گیا تھا۔ واردات کے بعد ملزم فیصل آباد فرار ہو گیا تھا، جہاں سے سیکیورٹی اداروں نے اسے گرفتار کر لیا۔