بھارتی پائلٹ ابھینندن کو زندہ گرفتار کرنے والے میجر معیز جنوبی وزیرستان میں شہید

بھارتی فضائیہ کے ونگ کمانڈر ابھینندن کو 2019 میں زندہ گرفتار کرنے والے پاک فوج کے دلیر افسر، میجر سید معیز عباس شاہ جنوبی وزیرستان میں خوارج دہشت گردوں کے خلاف آپریشن کے دوران شہید ہوگئے۔

پاک فوج کے شعبہ تعلقات عامہ (آئی ایس پی آر) کے مطابق، جنوبی وزیرستان کے علاقے سرا روغہ میں خفیہ اطلاعات کی بنیاد پر سیکیورٹی فورسز نے دہشت گردوں کے ایک مضبوط ٹھکانے پر کارروائی کی۔ آپریشن کے دوران بھارت کی سرپرستی میں سرگرم 11 خوارج کو ہلاک اور 7 کو زخمی کر دیا گیا۔

اس جھڑپ میں میجر سید معیز عباس شاہ اور لانس نائیک جبران اللہ مادر وطن پر قربان ہو گئے۔
میجر معیز عباس شاہ اس آپریشن کی قیادت کر رہے تھے، اور وہ خوارج کے خلاف متعدد جرأت مندانہ کارروائیوں کے لیے جانے جاتے تھے۔ شہید کی عمر 37 برس تھی اور ان کا تعلق ضلع چکوال سے تھا۔
لانس نائیک جبران اللہ، جن کی عمر 27 برس تھی، ضلع بنوں کے رہائشی تھے۔

ابھینندن گرفتاری کا پس منظر

یاد رہے کہ 27 فروری 2019 کو پاک فضائیہ نے لائن آف کنٹرول کی خلاف ورزی کرنے والے دو بھارتی طیارے مار گرائے تھے، جن میں سے ایک کے پائلٹ، ونگ کمانڈر ابھینندن، پاکستانی حدود میں گرفتار کیے گئے تھے۔

اس وقت، پاکستانی شہریوں نے جب پائلٹ کو گھیر لیا تھا تو میجر معیز عباس شاہ اور ان کی ٹیم موقع پر پہنچ گئی۔ میجر معیز نے شہریوں سے ابھینندن کو بچایا، ابتدائی طبی امداد فراہم کی اور باقاعدہ طور پر اسے تحویل میں لیا۔

بعد ازاں، پاکستان نے جذبہ خیر سگالی کے تحت ابھینندن کو رہا کر کے واہگہ بارڈر پر بھارتی حکام کے حوالے کر دیا تھا۔

ایک انٹرویو میں میجر معیز نے بتایا تھا کہ اُن کی پہلی ترجیح بھارتی پائلٹ کو زندہ گرفتار کرنا تھی۔ جب وہ جائے وقوعہ پر پہنچے تو دیکھا کہ ابھینندن نے ان کا یونیفارم دیکھتے ہی گرفتاری دے دی اور مدد کی درخواست کی۔