وزیراعظم شہباز شریف کا ایرانی صدر سے رابطہ، مشرق وسطیٰ کی صورتحال پر تبادلہ خیال

وزیراعظم محمد شہباز شریف نے اسلامی جمہوریہ ایران کے صدر ڈاکٹر مسعود پیزشکیان سے ٹیلیفون پر رابطہ کیا، جس میں مشرق وسطیٰ کی حالیہ کشیدہ صورتحال اور جنگ بندی کے امکانات پر تفصیلی تبادلہ خیال کیا گیا۔

وزیراعظم نے اس موقع پر ایران کے ساتھ یکجہتی اور تمام عالمی و علاقائی فورمز پر ایران کی اصولی حمایت کا اعادہ کیا۔ انہوں نے واضح کیا کہ پاکستان مشرق وسطیٰ میں تیزی سے بدلتے حالات پر گہری نظر رکھے ہوئے ہے اور خطے میں امن و استحکام کے لیے سفارت کاری اور مذاکرات کو ہی واحد مؤثر راستہ سمجھتا ہے۔

وزیراعظم شہباز شریف نے زور دیا کہ تمام فریقین کو بین الاقوامی قوانین اور اقوام متحدہ کے چارٹر کے اصولوں کا مکمل احترام کرنا چاہیے تاکہ تنازعات کے پرامن حل کو ممکن بنایا جا سکے۔

ایرانی صدر ڈاکٹر مسعود پیزشکیان نے پاکستان کی مستقل، اصولی اور غیر متزلزل حمایت پر شکریہ ادا کیا۔ انہوں نے خطے میں قیامِ امن کے لیے پاکستان کے تعمیری اور مثبت کردار کو سراہا۔

دونوں رہنماؤں نے اس بات پر اتفاق کیا کہ امتِ مسلمہ کو درپیش چیلنجز کے پیش نظر اتحاد، مشاورت اور قریبی رابطہ ناگزیر ہے۔ انہوں نے اس بات پر زور دیا کہ امت کو یکجہتی اور تعاون کے ذریعے ہر قسم کی آزمائش کا مؤثر انداز میں سامنا کرنا ہوگا۔