عالمی بینک نے پاکستان کیلئے19 کروڑ 40 لاکھ ڈالر قرض کی منظوری دیدی

عالمی بینک نے پاکستان کے لیے 19 کروڑ 40 لاکھ ڈالر کے قرض کی منظوری دے دی ہے، جسے بلوچستان میں2اہم منصوبوں پر خرچ کیا جائے گا۔
بینک کے مطابق یہ فنڈز بچوں کے لیے تعلیمی مواقع میں بہتری اور پانی کے تحفظ کے منصوبوں پر خرچ کیے جائیں گے، تاکہ صوبے میں انسانی ترقی اور ماحولیاتی تحفظ کو فروغ دیا جا سکے۔
عالمی بینک کے کنٹری ڈائریکٹر ناجے بن ہیسن نے کہا کہ ان منصوبوں کا بنیادی مقصد بلوچستان میں تعلیمی محرومی کو کم کرنا ہے۔ انہوں نے مزید بتایا کہ بلوچستان واٹر سیکیورٹی پراجیکٹ موسمیاتی تبدیلی کے اثرات سے نمٹنے میں بھی مددگار ثابت ہوگا۔
عالمی بینک کے دیگر عہدیداروں کا کہنا تھا کہ ان منصوبوں سے نہ صرف صوبے میں بنیادی ڈھانچے کو بہتر بنایا جائے گا بلکہ روزگار کے نئے مواقع بھی پیدا ہوں گے۔
واضح رہے کہ اس سے قبل ایشیائی ترقیاتی بینک (ADB) بھی پاکستان کے لیے 35 کروڑ ڈالر قرض کی منظوری دے چکا ہے، جسے خواتین کی مالی رسائی بہتر بنانے کے لیے استعمال کیا جائے گا۔