سندھ طاس معاہدے پر عالمی فیصلے کا خیر مقدم، پاکستان کا مؤقف درست ثابت ہوا: وزیر اعظم

وزیر اعظم شہباز شریف نے سندھ طاس معاہدے سے متعلق مستقل ثالثی عدالت کے حالیہ فیصلے کا خیر مقدم کیا ہے، جس میں بھارت کی جانب سے معاہدے کو یکطرفہ طور پر معطل کرنے کی کوشش کو غیر قانونی قرار دیا گیا ہے۔ وزیر اعظم کا کہنا ہے کہ اس فیصلے سے پاکستان کے مؤقف کو بین الاقوامی سطح پر تقویت ملی ہے اور یہ واضح ہو گیا ہے کہ بھارت معاہدے کو ازخود معطل نہیں کر سکتا۔

شہباز شریف نے کہا کہ عالمی عدالت کے اس فیصلے سے ثابت ہوتا ہے کہ سندھ طاس معاہدہ دونوں ملکوں کے لیے لازم ہے اور کسی ایک فریق کو اسے منسوخ یا معطل کرنے کا اختیار حاصل نہیں۔ اُنہوں نے زور دیا کہ پانی پاکستان کے لیے زندگی کی حیثیت رکھتا ہے، اور حکومت آبی وسائل کے مؤثر اور پائیدار استعمال کے لیے سرگرم ہے۔

وزیر اعظم نے وفاقی وزیر قانون اعظم نذیر تارڑ اور اٹارنی جنرل منصور اعوان کی کاوشوں کو بھی سراہا، جنہوں نے عالمی قانونی محاذ پر پاکستان کا مؤقف مضبوطی سے پیش کیا۔

قابل ذکر ہے کہ مستقل ثالثی عدالت نے بھارت کی جانب سے سندھ طاس معاہدے کی ثالثی کارروائی کو یکطرفہ طور پر معطل کرنے کی کوشش کو معاہدے کی خلاف ورزی قرار دیا ہے۔ عدالت نے اپنے فیصلے میں کہا کہ معاہدے میں ثالثی کی کارروائی روکنے کا کوئی جواز موجود نہیں اور کسی ایک فریق کو ایسا کرنے کا اختیار نہیں دیا گیا۔

فیصلے میں مزید کہا گیا کہ عدالت سندھ طاس معاہدے کے تحت اپنی قانونی حیثیت کے مطابق کردار ادا کرتی رہے گی اور بھارت کا معاہدہ معطل کرنے کا اقدام اس عمل کو متاثر نہیں کر سکتا۔