اسلام آباد ہائیکورٹ نے وفاقی حکومت کو سی ڈی اے کی تحلیل کا حکم دیدیا

اسلام آباد ہائیکورٹ نے ایک اہم فیصلے میں وفاقی حکومت کو ہدایت دی ہے کہ وہ کیپیٹل ڈیولپمنٹ اتھارٹی (سی ڈی اے) کو تحلیل کر کے اس کے تمام اختیارات اور اثاثے میٹروپولیٹن کارپوریشن اسلام آباد (ایم سی آئی) کو منتقل کرے۔

جسٹس محسن اختر کیانی کی جانب سے جاری کردہ تحریری فیصلے میں سی ڈی اے کی طرف سے رائٹ آف وے اور ایکسس چارجز کے نفاذ سے متعلق جاری کردہ ایس آر او کو کالعدم قرار دے دیا گیا۔ فیصلے میں واضح کیا گیا کہ ایس آر او کے تحت کیے گئے تمام اقدامات غیر قانونی تصور ہوں گے، اور اگر کسی شہری یا ادارے سے رقم وصول کی گئی ہے تو وہ فوری طور پر واپس کی جائے۔

عدالت نے ریمارکس دیے کہ سی ڈی اے آرڈیننس اب غیر مؤثر ہو چکا ہے کیونکہ اس کے قیام کا مقصد مکمل ہو چکا ہے۔ موجودہ قانونی فریم ورک کے تحت اسلام آباد کی شہری و بلدیاتی انتظامیہ "اسلام آباد لوکل گورنمنٹ ایکٹ" کے تحت چلتی ہے، جو مقامی حکومتوں کو اختیار دیتا ہے کہ وہ شفاف اور جمہوری طریقے سے انتظامی امور انجام دیں۔

عدالت نے وفاقی حکومت کو حکم دیا کہ سی ڈی اے کو تحلیل کرنے کا عمل فوری طور پر شروع کیا جائے، اور اختیارات کی منتقلی کے بعد ایک شفاف اور جوابدہ نظام یقینی بنایا جائے تاکہ شہریوں کے حقوق کا تحفظ قانون کے مطابق ممکن ہو۔

فیصلے میں مزید کہا گیا کہ اسلام آباد لوکل گورنمنٹ ایکٹ ایک خصوصی قانون ہے جو شہریوں کو نمائندہ حکومت فراہم کرتا ہے، اور اس کے تحت مقامی حکومت کی منظوری کے بغیر کوئی نیا ٹیکس عائد نہیں کیا جا سکتا۔

عدالت نے واضح کیا کہ سی ڈی اے کے پاس ٹیکس عائد کرنے کا اختیار نہیں تھا، جب کہ اس نے پیٹرول پمپس اور سی این جی اسٹیشنز پر غیر قانونی طور پر رائٹ آف ایکسس چارجز لاگو کیے ہوئے تھے۔