پاکستان اور ایران کا دفاعی و خارجہ امور پر براہِ راست مشاورت کا فیصلہ، اہم ملاقاتیں متوقع

پاکستان اور ایران نے خارجہ پالیسی، دفاعی امور اور علاقائی صورتحال پر براہِ راست دو طرفہ مشاورت کا فیصلہ کیا ہے۔ یہ اہم سفارتی سرگرمیاں رواں ہفتے آذربائیجان کے شہر شوشا میں ہونے والے اقتصادی تعاون تنظیم (ECO) کے سربراہی اجلاس کے موقع پر متوقع ہیں۔

ذرائع کے مطابق، نائب وزیراعظم و وزیر خارجہ اسحاق ڈار کی ایرانی ہم منصب سے اہم ملاقات طے پا گئی ہے، جبکہ وزیراعظم شہباز شریف کی ایرانی صدر مسعود پزشکیان سے جمعہ کے روز ملاقات متوقع ہے۔

پاکستانی وفد جمعرات کو آذربائیجان کے اسٹریٹجک اور تاریخی شہر شوشا پہنچے گا، جو حالیہ برسوں میں آرمینیا سے آزاد کرایا گیا تھا اور کاراباخ خطے کا ایک اہم مرکز سمجھا جاتا ہے۔

اجلاس کے موقع پر اسحاق ڈار کی ترک وزیر خارجہ حقان فدان کے علاوہ قازقستان، ازبکستان اور دیگر رکن ممالک کے وزرائے خارجہ سے بھی دو طرفہ ملاقاتیں متوقع ہیں۔

اس موقع پر پاکستانی وفد کی ملاقاتیں ترک صدر رجب طیب اردوان، آذربائیجان کے صدر الہام علییف اور دیگر علاقائی رہنماؤں سے بھی متوقع ہیں، جن میں باہمی تعاون، اقتصادی شراکت داری اور خطے کی مجموعی صورتحال پر تبادلہ خیال کیا جائے گا۔