امریکی خاتون پاکستان آ کر نوجوان سے شادی کے بندھن میں بندھنے کو تیار

سوشل میڈیا کی دوستی ایک بار پھر محبت میں بدل گئی۔ امریکی ریاست شکاگو سے تعلق رکھنے والی مینڈی نامی خاتون پاکستان پہنچ گئیں جہاں وہ خیبرپختونخوا کے ضلع اپر دیر کے رہائشی ساجد زیب خان سے رواں ہفتے اسلامی اصولوں اور مقامی رسم و رواج کے مطابق نکاح کریں گی۔

اسلام آباد ایئرپورٹ پر ساجد اور ان کے اہل خانہ نے مینڈی کا پرتپاک استقبال کیا، جس کی ویڈیو سوشل میڈیا پر وائرل ہو چکی ہے۔ ویڈیو میں مینڈی کو خوشگوار موڈ میں دیکھا جا سکتا ہے، جبکہ ساجد کے گھر والوں کی جانب سے گلدستہ پیش کیا گیا۔

پولیس ذرائع کے مطابق مینڈی اور ساجد کی دوستی کا آغاز فیس بک پر ہوا، جو کئی سالوں تک جاری رہی اور بالآخر دونوں نے شادی کا فیصلہ کر لیا۔ ساجد زیب کا کہنا تھا کہ مینڈی نے پہلے شادی کی خواہش ظاہر کی، جس پر انہوں نے رضامندی ظاہر کرتے ہوئے دونوں خاندانوں کو اعتماد میں لیا۔

مینڈی کا کہنا ہے کہ وہ پہلی بار پاکستان آئی ہیں اور یہاں آ کر اندازہ ہوا کہ پاکستان ایک خوبصورت اور پُرامن ملک ہے۔

یہ واقعہ سوشل میڈیا کے ذریعے بین الاقوامی تعلقات اور شادیوں کے بڑھتے رجحان کی ایک اور مثال ہے۔ یاد رہے کہ رواں ماہ کے آغاز میں بھی جنوبی کیرولینا سے تعلق رکھنے والی امریکی خاتون کیرنشا میڈسائن گریس نے جھنگ کے نوجوان نعیم الحسن سے سوشل میڈیا دوستی کے بعد اسلام قبول کر کے شادی کی تھی۔ انہوں نے اسلامی نام کنیز عائشہ اختیار کیا اور نکاح کے بعد مقامی عدالت میں بیان بھی ریکارڈ کروایا تھا۔

تاہم ہر ایسی کہانی کا انجام خوشگوار نہیں ہوتا۔ کچھ عرصہ قبل امریکی خاتون اونیجا اینڈریو رابنسن بھی اپنے پاکستانی دوست سے شادی کے ارادے سے پاکستان آئی تھیں لیکن محبت یک طرفہ ثابت ہوئی، اور انہیں مایوسی کے ساتھ وطن واپس جانا پڑا۔

اسی طرح تیونس کی 19 سالہ سندا ایاری کی کہانی بھی سوشل میڈیا کی محبت کے ایک تلخ تجربے کی عکاسی کرتی ہے۔ کراچی کے رہائشی محمد عامر سے شادی کے بعد تعلقات میں دراڑ آئی، اور صرف سات ماہ بعد طلاق ہوگئی۔ سندا کا ویزا بھی ختم ہو چکا تھا، اور وہ وطن واپسی کے لیے دربدر ٹھوکرے کھاتی رہیں۔ ذہنی دباؤ کے باعث خودکشی کی کوشش کے بعد انہیں تیونسی سفارتخانے کے ذریعے ملک واپس بھیجا گیا۔