15 سال تک کے بچوں کو پولیو ویکسین دینے کا فیصلہ

 وفاقی حکومت نے ملک سے پولیو کے خاتمے کے لیے ایک بڑا قدم اٹھاتے ہوئے 15 سال تک کے بچوں کو پولیو ویکسین دینے کا فیصلہ کر لیا ہے۔ اس بات کا اعلان وفاقی وزیر صحت سید مصطفیٰ کمال نے ایک نجی ٹی وی پروگرام میں سینئر صحافی آصف بشیر چوہدری سے گفتگو کے دوران کیا۔

انہوں نے بتایا کہ پانچ سال سے زائد عمر کے بچوں میں پولیو کیسز سامنے آنے کے بعد فیصلہ کیا گیا ہے کہ انسداد پولیو مہم میں اب 15 سال تک کے بچے شامل کیے جائیں گے۔
ابتدائی طور پر یہ مہم کراچی، لاہور، پشاور اور جنوبی خیبرپختونخوا کے مخصوص علاقوں میں شروع کی جائے گی۔

وفاقی وزیر نے یہ بھی کہا کہ پاکستان سے پولیو کے مکمل خاتمے کے لیے نئی قومی ڈیڈ لائن دسمبر 2026 مقرر کی گئی ہے۔

 جعلی ادویات کی روک تھام کے لیے بار کوڈ سسٹم:
مصطفیٰ کمال نے دواؤں کی شفاف فراہمی کے لیے بڑا قدم اٹھانے کا عندیہ دیتے ہوئے کہا کہ آئندہ تین ماہ کے اندر فروخت ہونے والی ہر دوا پر بار کوڈ موجود ہوگا۔

انہوں نے وضاحت کی کہ شہری اپنے موبائل فون سے دوا اسکین کر کے اس کی اصلیت، ایکسپائری تاریخ اور دیگر تفصیلات با آسانی جانچ سکیں گے۔
ان کے مطابق حکومت کی تیاری مکمل ہے، تاہم فارما انڈسٹری نے یہ نظام مکمل طور پر نافذ کرنے کے لیے تین ماہ کی مہلت مانگی ہے۔

 صحت کے دیگر شعبوں میں اصلاحات:
وفاقی وزیر صحت نے بتایا کہ حکومت نئی قومی ہیلتھ پالیسی لا رہی ہے جس میں بنیادی اصلاحات شامل ہوں گی۔
"وزیراعظم جلد اس پالیسی کی منظوری دیں گے،" انہوں نے کہا۔

ساتھ ہی انہوں نے بتایا کہ ڈریپ (Drug Regulatory Authority) کو مکمل ڈیجیٹل بنایا جا رہا ہے اور وزیراعظم ایک ہفتے بعد اس منصوبے کا باضابطہ افتتاح کریں گے۔

انہوں نے مزید کہا کہ حکومت نے مشروبات پر 50 فیصد ٹیکس لگانے کی تجویز دی تھی تاکہ عوامی صحت بہتر بنائی جا سکے، تاہم یہ تجویز منظور نہیں ہو سکی۔

نرسنگ سیکٹر میں بڑی تبدیلیاں:
وزیر صحت کے مطابق، نرسنگ کونسل کے قوانین میں مکمل تبدیلی کی جا رہی ہے۔
ان کا کہنا تھا کہ پاکستان میں 9 لاکھ نرسوں اور دنیا بھر میں 25 لاکھ نرسوں کی کمی ہے، جسے پورا کرنے کے لیے انقلابی اقدامات کیے جا رہے ہیں۔

 تشویشناک انکشاف:
آخر میں انہوں نے کہا کہ ملک میں ہر ایک منٹ میں ایک شہری ہارٹ اٹیک کی وجہ سے جان کی بازی ہار رہا ہے، جو کہ ایک سنگین صورتحال ہے اور فوری اقدامات کی متقاضی ہے۔