کراچی: تھیلیسیمیا کے مریضوں کیلئے کام کرنا ہم سب کی ذمہ دار ی ہے،گورنر نہال ہاشمی 

کراچی :گورنر سندھ سید نہال ہاشمی نے کہا ہے کہ جس نے انسان کو تخلیق کیا ہے وہ رب ہی شفا بخشنے والا ہے ۔بہت ساری بیماریاں انسان کی لاپرواہی کی وجہ سے پیدا ہوتی ہیں ہمیں احتیاط کرنا چاہیے ۔

تفصیلات کے مطابق تھیلیسیمیا آگاہی مہم کے ہفتے میں تھیلیسیمیا کے مریض بچوں کے ساتھ گفتگو کرتے ہوئے گورنر سندھ سید نہال ہاشمی نے کہا کہ میڈیکل سائنسز کی تحقیق کے بعد اب مختلف بیماریوں کی تشخیص ہورہی ہے ۔جب کوئی بیماری خون کے اندر ہوتی ہے اس کا بہترین علاج کرنا پڑتا ہے۔

انہوں نے کہا کہ تھیلیسیمیا کے مریضوں کیلئے کام کرنا ہم سب کی ذمہ دار ی ہے۔ جب کوئی اچھا کام کرتا ہے تو اس کو اللہ کی مدد بھی حاصل ہوتی ہے ۔انہوں نے کہا کہ شادی سے پہلے میڈیکل ٹیسٹ کروانا بہت اچھی بات ہے۔انہوں نے کہا گورنر ہاؤس ہمیشہ نیک کام کرنے والوں کی سپورٹ کرتے رہیں گے۔

تقریب سے خطاب کرتے ہوئے سندھ بلڈ‌ ٹرانس فیوژن کی سیکریٹری ڈاکٹر درےناز نے کہا کہ تھیلیسیمیا کے مریض بچوں کے لیے کوشش کرتے ہیں کہ ان کو علاج کو بہتر بنایا جائے ۔تیس ہزار سے زائد بچے تھیلیسیمیا کے سینٹرز میں رجسٹرڈ ہیں مگر اصل تعداد زیادہ ہے۔

ڈاکٹر درے ناز نے کہا کہ صوبے میں پانچ نادرہ کے سینٹرز ہیں جن پر تھیلیسیمیا کی وجہ سکریننگ ٹیسٹ مفت کیا جاتا ہے۔ ہم نے تھیلیسیمیا سے بچاؤ پر کام کرنا ہے تاکہ پاکستان کو تھیلیسیمیا فری کیا جا سکے۔