آذربائیجان کی پاکستان میں 2 ارب ڈالر کی سرمایہ کاری، معاہدے پر دستخط

باکو: وزیر اعظم شہباز شریف کے دورہ آذربائیجان کے دوران پاکستان اور آذربائیجان کے درمیان 2 ارب ڈالر کی سرمایہ کاری کے معاہدے پر دستخط ہو گئے۔

معاہدے پر دستخط وزیر خارجہ اسحاق ڈار اور آذربائیجان کے وزیر معیشت میکائل جباروف نے کیے۔ اس موقع پر وزیر اعظم شہباز شریف کی سربراہی میں پاکستانی وفد بھی موجود تھا۔

وزیر اعظم آفس سے جاری اعلامیے کے مطابق یہ معاہدہ دونوں ممالک کے درمیان سرمایہ کاری اور تجارتی روابط کو تاریخی سطح پر لے جائے گا اور برادرانہ تعلقات کے فروغ میں اہم سنگِ میل ثابت ہوگا۔

وزیر اعظم شہباز شریف نے باکو میں میڈیا سے گفتگو کرتے ہوئے کہا کہ آذربائیجان کے صدر الہام علیوف سے ملاقات انتہائی مثبت اور نتیجہ خیز رہی۔ انہوں نے پاکستان میں سرمایہ کاری پر صدر الہام علیوف کا شکریہ ادا کیا اور کہا کہ مستقبل میں اس تعاون میں مزید وسعت آئے گی۔

وزیر اعظم نے مزید کہا کہ آذربائیجان کی جانب سے پاکستان کے اقتصادی شعبے میں 2 ارب ڈالر کی سرمایہ کاری ایک اہم پیشرفت ہے، جو دونوں ممالک کے اقتصادی تعلقات کو نئی جہت دے گی۔