جسٹس سردار سرفراز ڈوگر 8 جولائی کو اسلام آباد ہائیکورٹ کے چیف جسٹس کا حلف اٹھائیں گے

اسلام آباد ہائیکورٹ کے نامزد چیف جسٹس جسٹس سردار سرفراز ڈوگر 8 جولائی کو اپنے عہدے کا حلف اٹھائیں گے۔ حلف برداری کی تقریب دوپہر ڈیڑھ بجے ایوانِ صدر میں منعقد ہوگی، جہاں صدرِ مملکت آصف علی زرداری ان سے حلف لیں گے۔

صدر مملکت نے سنیارٹی کے اصول کے تحت جسٹس سرفراز ڈوگر کو اسلام آباد ہائیکورٹ کا سینئر ترین جج قرار دیتے ہوئے ان کی تقرری کی منظوری دی۔

یاد رہے کہ جوڈیشل کمیشن آف پاکستان نے حال ہی میں چاروں ہائیکورٹس کے مستقل چیف جسٹسز کی تقرری کی سفارش کی تھی، جن میں:

جسٹس سردار سرفراز ڈوگر (اسلام آباد ہائیکورٹ)

جسٹس ایس ایم عتیق شاہ (پشاور ہائیکورٹ)

جسٹس روزی خان (بلوچستان ہائیکورٹ)

جسٹس محمد جنید غفار (سندھ ہائیکورٹ)

ذرائع کے مطابق اسلام آباد ہائیکورٹ کے چیف جسٹس کی تقرری کے لیے ہونے والے ووٹنگ اجلاس میں جسٹس سرفراز ڈوگر کے حق میں 9 ووٹ آئے۔ جبکہ چیف جسٹس آف پاکستان اور پی ٹی آئی سے تعلق رکھنے والے دو ارکان نے جسٹس گل حسن اورنگزیب کے حق میں ووٹ دیا، اور جسٹس منصور علی شاہ اور جسٹس منیب اختر نے جسٹس محسن اختر کیانی کی حمایت کی۔