یوم عاشور کے پُرامن انعقاد پر وزیراعظم کا سیکیورٹی اداروں، صوبائی حکومتوں کو خراج تحسین

یوم عاشور کے پُرامن اختتام پر وزیراعظم محمد شہباز شریف نے ملک بھر میں امن و امان برقرار رکھنے پر صوبائی حکومتوں، سیکیورٹی فورسز اور پولیس کو خراجِ تحسین پیش کیا۔

وزیراعظم سے وفاقی وزیر داخلہ محسن رضا نقوی نے ملاقات کی، جس میں یوم عاشور کے موقع پر کیے گئے سیکیورٹی اقدامات اور ملک بھر کی مجموعی سیکیورٹی صورتحال پر تفصیلی بریفنگ دی گئی۔

وزیر داخلہ نے وزیراعظم کو آگاہ کیا کہ یوم عاشور کے موقع پر عوام کے تحفظ اور سہولت کو یقینی بنانے کے لیے جامع سیکیورٹی پلان ترتیب دیا گیا، جس میں وفاق اور تمام صوبوں کے درمیان مکمل ہم آہنگی برقرار رکھی گئی۔

وزیراعظم نے تمام صوبوں کے وزرائے اعلیٰ کی کارکردگی کو سراہتے ہوئے کہا کہ متعلقہ علاقوں میں پیشہ ورانہ حکمتِ عملی اور مؤثر اقدامات کے باعث یوم عاشور پُرامن ماحول میں منایا گیا۔

انہوں نے پولیس، رینجرز اور دیگر قانون نافذ کرنے والے اداروں کی کارکردگی کی تعریف کرتے ہوئے کہا کہ ان اداروں نے ذمہ داری، مستعدی اور قومی جذبے کے ساتھ اپنی خدمات انجام دیں۔

وزیر داخلہ نے مزید واضح کیا کہ عوامی سہولت اور تحفظ کے لیے حکومت نے ہر ممکن وسائل بروئے کار لائے، اور سیکیورٹی کے تمام پہلوؤں پر مربوط حکمت عملی کے تحت عمل کیا گیا۔