پاکستان میں پہلی بار ایف بی آر کا مصنوعی ذہانت پر مبنی کسٹمز نظام متعارف، 92 فیصد کارکردگی میں بہتری

اسلام آباد: وزیراعظم محمد شہباز شریف کی خصوصی ہدایت پر فیڈرل بورڈ آف ریونیو (ایف بی آر) نے پاکستان کی تاریخ میں پہلی مرتبہ مصنوعی ذہانت (AI) پر مبنی کسٹمز کلیئرنس اور رسک مینجمنٹ سسٹم متعارف کرا دیا ہے۔ یہ جدید نظام ایف بی آر اصلاحات کا ایک نمایاں حصہ ہے جس کا مقصد ٹیکس نظام کو خودکار، شفاف اور مؤثر بنانا ہے۔

اسلام آباد میں پیر کے روز ایف بی آر اصلاحات پر منعقدہ جائزہ اجلاس کی صدارت کرتے ہوئے وزیراعظم نے کہا کہ ایف بی آر کی اصلاحات حکومت کی اولین ترجیحات میں شامل ہیں۔ انہوں نے زور دیا کہ ٹیکس دہندگان کو سہولت اور کاروباری برادری کو آسانی فراہم کرنے کے لیے ٹیکنالوجی کا مؤثر استعمال ضروری ہے۔

اجلاس کو بریفنگ میں بتایا گیا کہ نئے نظام کے تحت درآمدات اور برآمدات کے دوران اشیاء کی لاگت اور نوعیت کا اندازہ مصنوعی ذہانت اور بوٹس کے ذریعے لگایا جائے گا۔ ابتدائی آزمائش کے دوران اس نظام نے 92 فیصد تک کارکردگی میں بہتری دکھائی ہے۔

مزید بتایا گیا کہ نئے نظام کی ٹیسٹنگ کے دوران 83 فیصد زیادہ گڈز ڈیکلریشنز کی درست شناخت ممکن ہوئی، جب کہ گرین چینل کے ذریعے زیادہ تر کلیئرنسز فوری طور پر مکمل کی گئیں۔

وزیراعظم نے اس موقع پر کہا کہ اس ٹیکنالوجی کی بدولت انسانی مداخلت کم ہو جائے گی، شفافیت بڑھے گی، وقت اور مالی وسائل کی بچت ممکن ہو گی، اور کاروباری افراد کو زیادہ سہولت میسر آئے گی۔

انہوں نے ہدایت کی کہ اس نظام کو مکمل طور پر مربوط، پائیدار اور مسلسل اپڈیٹ رکھا جائے تاکہ اس کے فوائد طویل المدت بنیادوں پر حاصل کیے جا سکیں۔