نیتن یاہو کا دورہ واشنگٹن بے نتیجہ، غزہ جنگ بندی پر کوئی پیش رفت نہ ہو سکی

اسرائیلی وزیرِاعظم بنیامین نیتن یاہو نے واشنگٹن کا دورہ کسی ٹھوس پیش رفت کے بغیر مکمل کر لیا اور واپس روانہ ہو گئے۔ ان کا یہ دورہ غزہ میں جنگ بندی اور یرغمالیوں کی رہائی سے متعلق اہم مذاکراتی کوششوں کا حصہ تھا، تاہم کسی بڑے معاہدے یا پیش رفت کا اعلان نہیں کیا گیا۔

نیتن یاہو نے امریکی صدر ڈونلڈ ٹرمپ سے دو دن میں دو بار ملاقات کی، جن میں امریکی نائب صدر جے ڈی وینس بھی شریک تھے۔ ملاقاتیں وائٹ ہاؤس کے اوول آفس میں ہوئیں اور پیر کی رات ہونے والے عشائیے میں دونوں رہنماؤں نے ایک دوسرے کی تعریفوں کے پل باندھے۔

نیتن یاہو نے ملاقات کے بعد کہا "ہم اپنی کوششیں ایک لمحے کے لیے بھی ترک نہیں کر رہے۔ یہ تمام پیش رفت ہماری فوجی حکمت عملی کی مرہون منت ہے۔"

انہوں نے کہا کہ اسرائیل غزہ میں تین اہم اہداف حاصل کرنا چاہتا ہے تمام یرغمالیوں کی بازیابی،حماس کی عسکری و انتظامی صلاحیت کا مکمل خاتمہ،اور غزہ کو اسرائیل کے لیے مستقل خطرہ نہ بننے دینا۔

نیتن یاہو نے ایران کے خلاف امریکہ-اسرائیل مشترکہ اقدامات کو "امن کے امکانات کو وسعت دینے والا" قرار دیا، اور ابراہیم معاہدوں کے دائرہ کار میں توسیع کی امید ظاہر کی۔ اس موقع پر انہوں نے صدر ٹرمپ کو نوبیل امن انعام کے لیے نامزد کرنے کی باضابطہ درخواست بھی پیش کی۔

تاہم، جنگ بندی مذاکرات سے متعلق کوئی واضح پیش رفت سامنے نہ آ سکی۔ اس حوالے سے ایک اہم اشارہ امریکی ایلچی اسٹیو وٹکوف کا دوحہ کا طے شدہ دورہ منسوخ کرنا بھی ہے، جو اسرائیل اور حماس کے درمیان جاری بالواسطہ مذاکرات میں شرکت کے لیے ہونا تھا۔ مبصرین اس فیصلے کو مذاکراتی جمود کا مظہر قرار دے رہے ہیں۔