لیاری واقعہ: سندھ بلڈنگ کنٹرول اتھارٹی کے دفتر پر چھاپہ، 6 افسران گرفتار

لیاری میں عمارت گرنے کے واقعات کے بعد سندھ بلڈنگ کنٹرول اتھارٹی (ایس بی سی اے) کے 6 افسران کو گرفتار کر لیا گیا۔

میڈیا رپورٹس کے مطابق سادہ لباس اہلکاروں نے ایس بی سی اے کے دفتر پر چھاپہ مارا جہاں سے ادارے کے 6 افسران کو حراست میں لیا گیا ہے۔ جن افسران کو حراست میں لیا گیا ان میں 4  سینئرڈائریکٹرز، ایک ڈپٹی ڈائریکٹر، ایک اسسٹنٹ ڈائریکٹر بھی شامل ہیں۔

ایس بی سی اے کے 6 افسران کو پوچھ گچھ کے لیے حراست میں لیا گیا ہے۔ دوسری جانب 4 جولائی کو گرنے والی عمارت کا مقدمہ محکمہ بلدیات کی مدعیت میں درج کیا گیا  ہے جس میں ایس بی سی اے کے اعلیٰ افسران نامزد ہیں۔

واضح رہے کہ لیاری کے علاقے بغدادی میں 4 جولائی جمعہ کی صبح 5 منزلہ عمارت گرنے کا افسوسناک واقعہ پیش آیا تھا جس کے نتیجے میں عمارت مکمل طور پر زمین بوس ہوگئی۔

 عمارت گرنے کے اس واقعے میں خواتین سمیت 27 افراد جاں بحق ہوئے تھے۔