ثمربلور نے ن لیگ میں شمولیت کے بعد مخصوص نشست کے لیے کاغذات جمع کرا دیے

مسلم لیگ (ن) میں حال ہی میں شامل ہونے والی ثمربلور نے قومی اسمبلی کی مخصوص نشست کے لیے کاغذاتِ نامزدگی جمع کرا دیے۔

ان کے ہمراہ سابق رکن صوبائی اسمبلی جمشید مہمند کی اہلیہ نے بھی اسی نشست کے لیے اپنے کاغذات الیکشن کمیشن پشاور کے دفتر میں جمع کروائے۔

میڈیا سے گفتگو کرتے ہوئے ثمر بلور کا کہنا تھا کہ مسلم لیگ (ن) میں شمولیت ایک طویل غور و فکر کے بعد کیا گیا فیصلہ ہے، یہ کوئی فوری یا وقتی فیصلہ نہیں بلکہ گزشتہ ایک سال سے بات چیت جاری تھی۔

انہوں نے کہا کہ وہ پشاور کے عوام کے لیے حقیقی کام کرنا چاہتی ہیں، جبکہ شہر پر مسلط موجودہ قیادت صرف ذاتی مفادات کے حصول میں مصروف ہے۔

ثمر بلور نے وضاحت کی کہ غلام احمد بلور اب بھی ان کے خاندان کے بزرگ اور رہنما ہیں، اور ان کی عملی سیاست سے علیحدگی کے بعد ہی مسلم لیگ (ن) میں شمولیت کا فیصلہ کیا گیا۔

انہوں نے اے این پی اور اس کی قیادت کو آج بھی قابل احترام قرار دیا، اور یہ بات اپنے شہید شوہر ہارون بلور کی برسی کے موقع پر کہی۔ انہوں نے کہا کہ ہم اپنے شہداء کو ہمیشہ دل میں زندہ رکھتے ہیں۔

خیبر پختونخوا حکومت پر تنقید کرتے ہوئے ثمر بلور نے کہا کہ اس وقت صوبے میں حکومت کے نام پر صرف ایک سرکس چل رہی ہے۔ انہوں نے اعلان کیا کہ آئندہ عام انتخابات میں وہ پشاور سے مسلم لیگ (ن) کے ٹکٹ پر اپنے آبائی حلقے سے انتخاب لڑیں گی۔