پیپلز پارٹی پر کوئی دباؤ نہیں، کابینہ میں شمولیت کا امکان ختم: رانا ثناءاللہ

وزیراعظم کے مشیر برائے سیاسی امور رانا ثناءاللہ نے صدر مملکت کی تبدیلی سے متعلق خبروں کو محض "افواہ" قرار دیتے ہوئے کہا ہے کہ ایسی باتوں کی تردید کی ضرورت ہی نہیں تھی۔

ایک نجی ٹی وی چینل کے پروگرام میں گفتگو کرتے ہوئے رانا ثناءاللہ کا کہنا تھا کہ صدر کی تبدیلی کی افواہوں کے پیچھے بظاہر کوئی بیرونی ایجنسی یا غیر ملکی عناصر کارفرما ہو سکتے ہیں۔

انہوں نے کہا کہ پیپلز پارٹی پر نہ کوئی دباؤ ہے، نہ ہی اس کی وفاقی کابینہ میں شمولیت کی کوئی فوری خواہش دکھائی دیتی ہے۔ ان کے مطابق، جب کابینہ میں توسیع ہوئی تھی تو پیپلز پارٹی کی شمولیت کا امکان ضرور تھا، لیکن اب ایسا کوئی امکان باقی نہیں رہا۔

رانا ثناءاللہ نے واضح کیا کہ موجودہ اتحادی حکومت اور جو سیاسی نظام قائم ہے، اسے ہی جاری رہنا چاہیے، کیونکہ اگر اس نظام میں خلل آیا تو پورا سسٹم متاثر ہو سکتا ہے۔

پی ٹی آئی کے بانی کے بیٹوں کی پاکستان آمد پر تبصرہ کرتے ہوئے انہوں نے کہا کہ اگر وہ صرف اپنے والد سے ملاقات کے لیے آ رہے ہیں تو یہ ان کا انسانی اور قانونی حق ہے۔ تاہم اگر وہ کسی سیاسی تحریک یا سرگرمی میں شامل ہوتے ہیں، تو یہ ان کا جمہوری حق ضرور ہے، لیکن انہیں اس کے نتائج کا بھی سامنا کرنا ہوگا۔

رانا ثناءاللہ کا کہنا تھا کہ پاکستان کی سیاست میں گرفتاری کوئی انوکھی بات نہیں۔ جب تک بانی پی ٹی آئی کے بیٹے قانون کو ہاتھ میں نہیں لیتے، وہ محفوظ ہیں۔

انہوں نے یہ بھی یاد دلایا کہ موروثی سیاست کی مخالفت موجودہ حکومت نے نہیں بلکہ خود پی ٹی آئی کے بانی نے ماضی میں کی تھی۔