ایم کیو ایم کے بانی الطاف حسین شدید بیمار ہونے پر اسپتال داخل

لندن: متحدہ قومی موومنٹ( ایم کیوایم) پاکستان کے بانی اور سابق سربراہ الطاف حسین کوشدید علیل ہونے پر اسپتال داخل کروا دیا گیا،جہاں ان کےمختلف ٹیسٹ کئے گئے۔

واضح رہے کہ الطاف حسین ایم کیو ایم کے بانی ہیں، جسے پہلے مہاجر قومی موومنٹ کے نام سے جانا جاتا تھا، انہوں نے اردو بولنے والوں کی نمائندگی کے لیے ایک سیاسی جماعت کا آغاز کیاتھا۔

 الطاف حسین اس وقت لندن میں مقیم ہیں، جہاں وہ 1992 سے خود ساختہ جلاوطنی کاٹ رہے ہیں، بعد ازاں انہیں برطانوی شہریت مل گئی تھی۔
لندن سے الطاف حسین نے سیاست میں فعال کردار ادا کیا، وہ باقاعدگی سے کراچی میں اپنے کارکنان سے خطاب کرتے تھے۔

لندن میں مقیم ایم کیو ایم کے سینئر رہنما مصطفیٰ عزیزآبادی نے سماجی رابطے کی ویب سائٹ ایکس پر بتایا کہ ’ایم کیو ایم کے بانی و قائد الطاف حسین کو شدید علالت کے باعث لندن کے ہسپتال میں داخل کرایا گیا ہے جہاں ان کے مختلف ٹیسٹ کیے گئے ہیں‘۔

انہوں نے عوام سے ایم کیو ایم کے بانی کی صحتیابی کے لیے دعا کی اپیل کی۔

اپنے ویڈیو پیغام میں عزیزآبادی نے کہا کہ حسین کی حالت گزشتہ رات بگڑ گئی اور ڈاکٹر کے معائنے اور سفارش کے بعد انہیں اسپتال میں داخل کرایا گیا جہان ان کے متعدد ٹیسٹ کروائے گئے۔

ویڈیو پیغام میں عزیزآبادی نےمزید کہا کہالطاف حسین انتہائی طبی نگہداشت (آئی سی یو)میں ہیں اور انہوں نے امید ظاہر کی کہ "پریشان ہونے کی کوئی بات نہیں ہے۔"