پاکستان ہاکی ٹیم میں بھارت میں ہونے والے ایشیا کپ میں شرکت نہیں کرے گی،حکومتی ذرائع

لاہور: پاکستان نے کشیدہ تعلقات اور ٹیم کو لاحق سیکیورٹی خدشات کو دیکھتے ہوئے ایشیا کپ کے لیے ہاکی ٹیم کو بھارت نہ بھیجنے کا فیصلہ کرلیا۔

تفصیلات کے مطابق حکومتی ذرائع کا کہنا ہے کہ پاکستان نے ہمیشہ کھیلوں کو ملکی سیاست سے بالا تر رکھا ہے، جبکہ بھارت نے کھیلوں کو سیاست کی نذرکیا اور متنازعہ بنایا ہے،جس کو مدنظر رکھتے ہوئے پاکستان نے ہاکی ٹیم کوبھارت میں ایشیا کپ ٹورنامنٹ میں نہ بھیجنے کا فیصلہ کیا ہے۔

ذرائع کے مطابق بھارتی میڈیا پاکستان کے خلاف زہر اگل رہا ہے،انتہا پسند تنظیمیں سوشل میڈیا اکاؤنٹس سے پاکستان ہاکی ٹیم کودھمکیاں دےرہی ہیں۔

ذرائع کا کہنا ہے کہ موجودہ صورتحال اورٹیم کولاحق سیکیورٹی خدشات کو دیکھتے ہوئے کھلاڑیوں کو نہیں بھیجا جا سکتا۔

واضح رہے کہ 3 جولائی کو بھاررتی حکومت نے پاکستان ہاکی ٹیم کے کھلاڑیوں کو ایشیا کپ میں شرکت کے لیے ویزے جاری کرنے کی منظوری دے دی تھی۔

بھارتی میڈیا نے رپورٹ کیا تھا کہ پاکستان ہاکی ٹیم ایشیا کپ میں شرکت کرے گی، قومی ٹیم بھارت کے شہر راجگیر، بہار میں ایشیا کپ میں شرکت کرے گی۔

یاد رہے کہ ایشیا کپ ہاکی 27 اگست سے 7 ستمبر 2025 تک بھارت میں شیڈول ہے۔