ایف آئی اے کی کامیاب کارروائی،انسانی اسمگلنگ میں ملوث 3 ملزمان گرفتار

کوئٹہ: وفاقی تحقیقاتی ادارے (ایف آئی اے ) کے اینٹی ہیومن ٹریفکنگ سرکل نےکامیاب کارروائی کرتےہوئے انسانی اسمگلنگ میں ملوث 3 ملزمان کو گرفتار کرلیا۔

تفصیلات کے مطابق ایف آئی اے نے خفیہ اطلاع پرکارروائی کرتے ہوئے سریاب روڈ پر اسنیپ چیکنگ کے دوران 3 ملزمان کو گرفتار کر لیا گیا۔ 

ترجمان ایف آئی اے کے مطابق کارروائی کے دوران 17 مشتبہ افراد سے پوچھ گچھ کی گئی جس کے بعد شواہد کی روشنی میں تین افراد کو حراست میں لیا گیا۔

ترجمان نے مزید بتایا کہ گرفتار ملزمان کی شناخت حمد اللہ عرف کشمیر، گل زمان اور محمد اسلم کے نام سے ہوئی جو کہ انسانی اسمگلنگ کے گھناؤنے جرم میں ملوث ہیں۔

ترجمان کے مطابق کارروائی کے دوران تین موبائل فونز اور ایک نوٹ پیڈ بھی برآمد کیا گیا، ابتدائی جانچ سے ملزمان کے انسانی اسمگلنگ میں ملوث ہونے کے شواہد سامنے آئے ہیں۔

ترجمان کا کہنا تھا کہ گرفتار ملزمان کے خلاف قانونی کارروائی کےلیے مزید تفتیش کا آغاز کر دیا گیا ہے۔