40 ہزار پاکستانی زائرین عراق، شام اور ایران جا کر غائب ہو گئے،وزیر مذہبی امور کا انکشاف

وفاقی وزیر مذہبی امور سردار یوسف نے انکشاف کیا ہے کہ 40 ہزار پاکستانی زائرین عراق، شام اور ایران جا کر غائب ہو گئے۔

پریس کانفرنس سے خطاب کرتے ہوئے سردار یوسف کا کہنا تھا کہ معلوم نہیں زائرین کہاں گئے۔ حکومت پاکستان کے پاس ریکارڈ دستیاب نہیں ، عراق ، ایران  شام نے بھی پاکستان کیساتھ یہ مسئلہ اٹھایا تھا۔

انہوں نے کہا کہ اب حکومت نے زائرین کو منظم کرنے کیلئے نیا کمپیوٹرائزڈ نظام متعارف کرایا ، جس کے تحت اب یہ زائرین مخصوص، رجسٹرڈ زائرین گروپ آپریٹرز کے ذریعے ہی سفر کریں گے۔

وفاقی وزیر نے بتایا کہ اب تک 14 سو سے زائد کمپنیوں نے وزارت کے ساتھ بطور زیارت گروپ آرگنائزر رجسٹریشن کیلئے درخواستیں جمع کروائی ہیں ۔ ایران، عراق کے مقدس مقامات کی زیارات کا نیا مربوط نظام لا رہے ہیں۔

ان کا کہنا تھا کہ وفاقی کابینہ نے زائرین گروپ آرگنائزرز (ZGOs) کا نیا نظام منظور کیا تھا جس پر عمل کرتے ہوئے وزارت نے ایک اشتہار جاری کیا تھا۔ سکیورٹی کلیئر کرنے والی 585 کمپنیوں کو ہدایت کی گئی ہے کہ وزارت کی ویب سائٹ کے ذریعے آن لائن رجسٹریشن کا عمل فوری مکمل کرتے ہوئے اپنی دستاویزات 31جولائی سے قبل وزارت کو ارسال کریں ۔