بشریٰ بی بی کے بیٹے موسیٰ مانیکا کی فائرنگ سے ملازم زخمی،ملزم گرفتار

پاکپتن کے نواحی گاؤں پیر غنی میں سابقہ خاتون اول بشریٰ بی بی کے بیٹے موسیٰ مانیکا کی مبینہ فائرنگ سے ملازم زخمی ہوگیا۔

 پولیس کے مطابق موسیٰ مانیکا نے تکرار کے دوران طیش میں آکر فائرنگ کردی، جس سے 17 سالہ علی بہادر زخمی ہو گیا جسے فوری طور پر ڈسٹرکٹ ہیڈکوارٹرہسپتال منتقل کردیاگیا جہاں اس کای حالت خطرے سے باہر بتائی جا رہی ہے۔

 پولیس کی جانب سے مزید بتایا گیا کہ یہ واقعہ خاور مانیکا کے ڈیرے پر پیش آیا، اطلاع ملتے ہی تھانہ صدر پولیس نے کارروائی کرتے ہوئے موسیٰ مانیکا کو ڈیرے سے گرفتار کر لیا۔

ڈی پی او پاکپتن کے مطابق ملزم موسیٰ مانیکا کا کہنا ہے کہ اس نے کام میں غفلت برتنے پر ملازم کو فائرنگ کر کے زخمی کیا۔

پولیس حکام کے مطابق فائرنگ کے واقعے کی تفتیش کا آغاز کر دیا گیا ہے، اور موسیٰ مانیکا سے پوچھ گچھ جاری ہے۔