علیمہ خان، شبلی فراز اور سلمان اکرم راجہ نے عمران خان کو ہم سے دور کیا: شیر افضل مروت

تحریکِ انصاف کے سابق رہنما شیر افضل مروت نے الزام عائد کیا ہے کہ عمران خان کو ان کے قریبی ساتھیوں سے دور کرنے میں علیمہ خان، شبلی فراز اور سلمان اکرم راجہ کا اہم کردار رہا ہے۔

لندن میں میڈیا سے گفتگو کرتے ہوئے شیر افضل مروت نے کہا کہ علیمہ خان پارٹی کے رہنماؤں اور کارکنوں پر دباؤ ڈالتی ہیں اور انھیں نظرانداز یا تنگ کرتی رہی ہیں۔ انہوں نے دعویٰ کیا کہ "علیمہ خان نے پی ٹی آئی کی پوری قیادت کی بے عزتی کرائی ہے۔"

انہوں نے مزید کہا کہ اب علیمہ خان کے پاس موقع ہے کہ وہ بانی پی ٹی آئی کی رہائی کے لیے تحریک کی قیادت خود کریں۔ "ہم چاہتے ہیں کہ وہ اور ان کے بچے خود تحریک کا حصہ بنیں۔"

 "اپنے بچے لندن، دوسروں کے بچے سڑکوں پر؟
شیر افضل مروت کا کہنا تھا کہ علیمہ خان نے پشتون نوجوانوں سے کہا کہ وہ سڑکوں پر نکلیں اور احتجاج کریں، جبکہ اپنے بچوں کو بیرونِ ملک، لندن بھیج دیا۔ "یہ کہاں کا انصاف ہے؟ اپنے بچے باہر اور دوسروں کے بچے خطرے میں ڈال دیے جائیں؟"

انہوں نے الزام لگایا کہ سلمان اکرم راجہ پارٹی میں خود کو "کسی کلاس کا مانیٹر" سمجھتے ہیں، اور انہوں نے بھی پارٹی میں تفریق پیدا کرنے میں کردار ادا کیا ہے۔ شبلی فراز پر بھی یہی الزام لگایا کہ وہ عمران خان سے اہم ساتھیوں کو دور رکھنے میں شامل رہے۔