تاجر برادری نے ملک گیر ہڑتال مؤخر کر دی، حکومت سے مذاکرات جاری رکھنے کا فیصلہ

اسلام آباد :  فیڈریشن آف پاکستان چیمبرز آف کامرس اینڈ انڈسٹری (FPCCI) نے اعلان کیا ہے کہ ملک بھر میں کاروباری برادری کی جانب سے ہڑتال کا فیصلہ واپس لے لیا گیا ہے۔ یہ فیصلہ حکومت کی جانب سے مالیاتی قوانین پر نظرثانی کی یقین دہانی کے بعد سامنے آیا ہے۔

صدر FPCCI عاطف اکرام شیخ نے ایک پریس کانفرنس میں کہا کہ "ہم کسی سے لڑائی نہیں چاہتے، ہمارے تحفظات کو حکومت سن رہی ہے، اور ہم مسائل کا حل مذاکرات سے چاہتے ہیں۔"

انہوں نے کہا کہ فنانس ایکٹ کی شق 37A اور 40B پر کاروباری برادری کے اعتراضات سامنے آئے تھے، جن پر حکومت نے نظرثانی کی یقین دہانی کرائی ہے۔ اس مقصد کے لیے ایک چار رکنی کمیٹی بھی قائم کی گئی ہے۔

 وزیرِ اعظم سے منظوری کا انتظار
عاطف اکرام شیخ نے واضح کیا کہ اب یہ تجاویز وزیرِ اعظم شہباز شریف کی منظوری کے بعد حتمی شکل اختیار کریں گی۔ ان کا کہنا تھا:

"پورے پاکستان میں ہڑتال نہیں ہوگی، لیکن یہ ممکن ہے کہ چند ایک شہروں میں جزوی ردِعمل دیکھنے کو ملے۔"

 تمام بڑے چیمبرز کا اعتماد حاصل
سینئر نائب صدر FPCCI ثاقب فیاض مگوں نے بتایا کہ اس اجلاس میں کراچی، لاہور، فیصل آباد، گوجرانوالہ اور کوئٹہ سمیت ملک کے بڑے تجارتی شہروں کے نمائندے شریک تھے، اور تمام چیمبرز نے ہڑتال نہ کرنے پر اتفاق کیا۔

 انجمن تاجران بھی ہم آواز
صدر انجمن تاجران اجمل بلوچ نے کہا کہ "یہ پہلا موقع ہے کہ فیڈریشن اور انجمن تاجران ایک ہی مؤقف پر اکٹھے ہیں۔ اگر حکومت نے مسائل حل نہ کیے تو ہڑتال کا آپشن پھر زیر غور آئے گا۔"

ان کے مطابق حکومت کے نمائندہ ہارون اختر نے چار نکاتی فریم ورک پر عملدرآمد کی یقین دہانی کروائی ہے، اور مذاکرات بھی مثبت رہے ہیں۔