بھارتی تیلگو فلم انڈسٹری کے معروف کامیڈین فِش وینکٹ انتقال کر گئے

بھارت کی تیلگو فلم انڈسٹری کے مشہور اداکار اور کامیڈین منگالم پالی وینکٹیش، جو "فِش وینکٹ" کے نام سے مشہور تھے، 53 برس کی عمر میں انتقال کر گئے۔

بھارتی میڈیا کے مطابق فِش وینکٹ طویل عرصے سے گردوں کے مرض میں مبتلا تھے، اور اُن کے گردے مکمل طور پر ناکارہ ہو چکے تھے۔ وہ بھارتی شہر حیدرآباد کے ایک مقامی اسپتال میں کئی دنوں سے وینٹیلیٹر پر زیرِ علاج تھے اور بالآخر زندگی کی بازی ہار گئے۔

فِش وینکٹ نے اپنے فلمی کیریئر کا آغاز 2000 میں کیا اور تیلگو سنیما کی کئی سپر ہٹ فلموں میں بطور ولن اور کامیڈین اپنی صلاحیتوں کا لوہا منوایا۔ ان کی مزاحیہ اداکاری نے انہیں مداحوں میں منفرد شناخت دلائی۔

رپورٹس کے مطابق حالیہ دنوں میں ان کے اہلِ خانہ کو ایک جعلی فون کال موصول ہوئی، جس میں دعویٰ کیا گیا تھا کہ اداکار پربھاس نے فِش وینکٹ کی گردوں کی پیوندکاری کے لیے 50 لاکھ بھارتی روپے دینے کا اعلان کیا ہے۔ بعد ازاں یہ کال جھوٹی ثابت ہوئی۔