بھارتی ریاست ہماچل پردیش میں قدیم روایت کے تحت ہونے والی ایک انوکھی شادی

شملہ: بھارتی ریاست ہماچل پردیش میں ایک انوکھا واقعہ پیش آیا جہاں دو بھائیوں نے ایک ہی خاتون سے شادی رچا لی۔

بھارتی میڈیا رپورٹ کے مطابق یہ انوکھا واقعہ ریاست ہماچل پردیش میں پیش آیا، جہاں ہاٹی قبیلے کے دو بھائیوں نے ایک ہی خاتون سے شادی رچا لی۔

میڈیا رپورٹ کے مطابق شادی کی تقریب12 جولائی کو ہوئی اور تین دنوں تک جاری رہی جس میں گاؤں کے سیکڑوں افراد نے شرکت کی، اور یہ شادی اس قدیم قبائلی روایت کا حصہ تھی جس میں ایک سے زیادہ شوہر رکھنے کا رواج ہے۔

رپورٹ کےمطابق دلہن سنیتا چوہان سے پردیپ اور کپیل نیگی نے شادی کی، تینوں نے کہا کہ انہوں نے یہ فیصلہ کسی بھی دباؤ کے بغیر کیا۔

رپورٹس میں مزید بتایا گیا ہے کہ دُلہے پردیپ کا تعلق شیلائی گاؤں سے ہے اور وہ سرکاری ملازم ہے جب کہ اس کا چھوٹا بھائی کپیل بیرون ملک روزگار کے سلسلے میں مقیم ہے،ا س شادی کو لے کر دونوں بھائیوںنے کہا کہ یہ فیصلہ "مشترکہ” تھا اور انہیں اپنی روایت پر فخر ہے۔

ہماچل پردیش کے ریونیو قوانین کے تحت اس رواج کو  'جودیدارا' کا نام دیا گیا ہے،ضلع ٹرانسگیری کے گاؤں بدھانا میں گزشتہ 6 برسوں کے دوران اس طرح کی 5 شادیاں ہوچکی ہیں۔

خیال رہے کہ ہاٹی قبیلے میں ایک خاتون کی ایک سے زیادہ شوہر رکھنے کی روایت صدیوں سے چلی آرہی تھی لیکن خطے میں آباد قبیلوں کی خواتین میں تعلیم اور معاشی بہتری کے بعد خواتین کے ایک سے زائد شوہر رکھنے کی روایت دم توڑ گئی تھی۔

دوسری جانب گاؤں کے بزرگوں کا کہنا ہےکہ اس طرح کی شادیاں خفیہ طور پر کی جاتی ہیں اور معاشرے میں تسلیم کی جاتی ہیں لیکن اس کی تعداد کم ہے۔