پاکستان میں توانائی کا نیا دور ، حکومت کا فری انرجی مارکیٹ پالیسی نافذکرنے کا اعلان 

اسلام آباد : وفاقی وزیر توانائی سردار اویس احمد خان لغاری نے اعلان کیا ہے کہ ملک کی تاریخ میں پہلی بار فری انرجی مارکیٹ پالیسی آئندہ دو ماہ میں مکمل طور پر نافذ کر دی جائے گی، جس کے بعد حکومت بجلی کی خریداری سے مستقل طور پر دستبردار ہو جائے گی۔

پاور ڈویژن کے اعلامیے کے مطابق یہ بات وزیر توانائی نے عالمی بینک کے ریجنل نائب صدر عثمان ڈیون کی سربراہی میں آئے وفد سے ملاقات کے دوران کہی ۔ 

تفصیلات کے مطابق اویس لغاری نے بتایا کہ نئی پالیسی کے تحت کمپیٹیٹو ٹریڈ بائی لیٹرل کنٹریکٹ مارکیٹ (CTBCM)ماڈل اپنایا جا رہا ہے، جس سے بجلی کی آزادانہ تجارت ممکن ہو سکے گی۔

انہوں نےمزید کہا کہ ’وِیلنگ چارجز‘ اور دیگر ضروری میکانزم متعارف کروائے جا رہے ہیں جبکہ حکومت کا کردار صرف ریگولیٹری فریم ورک تک محدود ہوگا تاکہ مارکیٹ خودمختار انداز میں کام کر سکے۔

وفاقی وزیر نے بتایا کہ یہ منتقلی مرحلہ وار اور جامع حکمت عملی کے تحت ہوگی تاکہ نظام میں کسی قسم کی بے ترتیبی نہ آئے۔

ملاقات کے دوران سردار اویس لغاری نے وفد کو توانائی اصلاحات، نیٹ میٹرنگ، نجکاری، اور سرمایہ کاری کے نئے مواقع سے متعلق آگاہ کیا۔
عثمان ڈیون نے حکومت پاکستان کی اصلاحاتی کوششوں کو سراہا اور کہا کہ توانائی کسی بھی ملک کی ترقی کی بنیاد ہے، عالمی بینک اس شعبے میں پاکستان کی مکمل حمایت کرے گا۔ 

وزیر توانائی نے وفد کو اصلاحات پر مبنی ایک جامع کتابچہ بھی پیش کیا اور امید ظاہر کی کہ عالمی بینک ساتھ شراکت داری مستقبل میں مزید مستحکم ہو گی۔